Шууд

Германы Дотоод хэрэг, хууль зүйн яамныхан аюулгүй байдлыг чангатгахаар тохиролцжээ

2017-01-11 15:58:20

Германы Дотоод хэрэг, хууль зүйн яамныхан улс орны үндэсний аюулгүй байдалд ноцтой аюул учруулахуйц этгээдийн эсрэг авч байгаа арга хэмжээгээ чангатгахаар тохиролцсон байна. Берлин дэх халдлагын дараагаар ийм арга хэмжээ авч эхэлсэн ч цаашид чангатгахаар болж байна.

Тодруулбал, Берлины зул сарын баярын үзэсгэлэн худалдааны үеэр халдлага гарсны дараагаар Германы хууль зүйн сайд Хайко Маас, Дотоод  хэргийн сайд Томас  Де Мезьер нар олон нийтийн аюулгүй байдалд аюул учруулахуйц этгээдүүдийн эсрэг авах цогц арга хэмжээг зөвшилцсөн юм.

Сайдууд өчигдрийн уулзалтынхаа дараагаар хэвлэлийн бага хурал хийлгэхдээ сэжигтнийг албадан гаргах нөхцөл шаардлагыг багасгах санал тавьж байгаагаа ч мэдэгдсэн байна. Мөн хувийн мэдээллээ бүрэн  өгөөгүй  орогнол хүсч байгаа дүрвэгч болоод цагаачдад амьдрах  хот, суурингийн  сонголт  хийх эрхэд нь хязгаар  тавих,  улс орны үндэсний аюулгүй байдалд  ноцтой хор хохирол учруулж болзошгүй этгээдийг хянах цахим бугуйвч  зүүхийг хуульчлан  баталгаажуулахаар төлөвлөж байгаагаа ч мэдэгдсэн юм. Үүний зэрэгцээ исламын  хэт даврагчидтай  холбоотой  аливаа эрсдэл, аюул  занахийллээс урьдчилан  анхааруулах  ажлыг  эрчимжүүлэхээ амлаж байна.

Мөн Герман улсад дүрвэгчид нь ирж байгаа улс орнуудын  эрх баригчидтай яриа хэлэлцээ хийх, үүний тулд  улс  төрийн бүхий л хөшүүргийг түүний дотор эдийн засгийн тусламж дэмжлэг үзүүлэх  боломжийг ашиглах ёстой гэж  үзэж буй юм байна. Германы аюулгүй байдлын албаныхан 548 хүнийг  исламын  террорист байх өндөр магадлалтай гэж ангилж байгаагийн  тал хувь нь тус улсын нутаг дэвсгэрт байгаа гэж үздэг байна. Тэдгээрийн 62-ыг нь улс орны үндэсний аюулгүй байдалд ноцтой хохирол учруулна гэж үзэж албадан буцаахаар төлөвлөж буй юм байна.  

Нийтэлсэн: Moнголын мэдээ

Германы Дотоод хэрэг, хууль зүйн яамныхан аюулгүй байдлыг чангатгахаар тохиролцжээ   
Үзсэн: 723 Mongolian National Broadcast  

Анхааруулга:

Монгол Улсын Сонгуулийн тухай хуулийн холбогдох заалтын дагуу сайтын сэтгэгдэл бичих хэсгийг хаасан болно.

Бидэнтэй нэгдээрэй