Шууд Chart

Хиймэл оюун ухаант робот Саудын Арабын хаант улсын иргэншилтэй боллоо

2017-10-30 10:37:16

Хонгконгийн “Хэнстон Роботигс” компани “София" нэртэй хиймэл оюун ухаант роботыг зохион бүтээж сүүлийн жилүүдэд туршилт судалгаагаа сайжруулсаар байна. Өчигдөр Саудын Арабын хаант улсад зохион байгуулагдсан “Ирээдүйн хөрөнгө оруулагчдын санаачилга” нэртэй олон улсын үйл ажиллагаанд "София" робот оролцжээ.

Түүнд Саудын Арабын хаант улс улсынхаа иргэншлийг олгосон түүхэнд тэмдэглүүштэй үйл явдал энэ үеэр боллоо. Энэ бол дэлхийд хамгийн анх удаа хиймэл оюун ухаант робот улсын иргэншил авч байгаа явдал юм.

"София"-г индэрт урьж иргэншил олгож байгааг нь дуулгахад тэрбээр “Баярлалаа. Би онцгой нэр хүндтэй болж байгаадаа үнэхээр бахархаж байна. Робот хүн төрөлхтний дунд анхны иргэншлийг авч байгаа явдал нь түүхэн үйл явдал боллоо” хэмээн талархсан сэтгэгдлээ илэрхийлсэн байна.

Тус үйл ажиллагаанд оролцсон дэлхийн томоохон хэвлэл мэдээллийн хэрэгслүүд, тэр дундаа АНУ-ын "Нью-Йорк Таймс" сонин, "Си-Эн-Би-Си" телевизийн сурвалжлагчид "София"-гаас "Та яагаад ийм их аз жаргалтай, мишээсэн царай гаргаж байгаа юм бэ" гэж асуухад “Би ийм их ухаалаг, баян чинээлэг, нэр нөлөө бүхий алдартай хүмүүсийн өмнө гарч ирж, ярилцаж байгаадаа таатай байна” хэмээн хариулжээ. 

Энэ нь олон улсын анхаарлыг хамгийн ихээр татсан сэдэв болоод байна. Түүний хоолойны өнгө аяс, нүүрний хувирал, асуултад хариулахын өмнө бодох хугацаа зэрэг нь тус роботыг хөгжүүлэгчдийн хувьд хамгийн их цаг хугацааг зарцуулсан нь илт байсан юм.

Учир нь "София" яг л бодит хүн мэт бусадтай нээлттэй яриа өрнүүлж чадсан юм. Мөн тэрбээр бусдаас, өөрийгөө хүрээлэн буй хүмүүсээс бие даан суралцах чадвартай болсон байна. Энэ программыг хиймэл оюун ухаант бодьгал гэж зохион бүтээгчид нь онцолсон юм.

Түүнчлэн София "Би хүмүүстэй зэрэгцэн ажиллаж, амьдрахыг хүсэж байна. Ингэхийн тулд хүний сэтгэл хөдлөлийг илэрхийлэх чадвартай байх хэрэгтэй” хэмээн ярьжээ.  

Нийтэлсэн: Moнголын мэдээ

Хиймэл оюун ухаант робот Саудын Арабын хаант улсын иргэншилтэй боллоо   
Үзсэн: 1328 Mongolian National Broadcaster  

Сэтгэгдэл бичих:

АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.
1000 Сэтгэгдэлээ бичнэ үү

Бидэнтэй нэгдээрэй