Шууд Chart

Монгол Улс хилийн чанадад худалдааны төлөөлөгчийн газрууд нээнэ

2018-08-10 14:27:00

Засгийн газрын 2016-2020 оны үйл ажиллагааны хөтөлбөрт бүх улстай хөгжүүлэх худалдаа, эдийн засгийн харилцаанд тэргүүлэх ач холбогдол өгч ажиллан, гадаадын хөрөнгө оруулалтыг нэмэгдүүлэх, хөрөнгө оруулагчдын итгэлийг сэргээх, олон улсын худалдааны болон хөрш орнуудын боомтын бүсэд үйлдвэрлэл, худалдааг хөгжүүлэх, “Монгол экспорт” хөтөлбөр хэрэгжүүлэх, жижиг, дунд бизнес эрхлэгчдийн бизнесээ өргөжүүлэн хөгжүүлэх боломжийг нэмэгдүүлнэ гэж тусгасан.

Энэ зорилтын хүрээнд Засгийн газрын 2018 оны наймдугаар сарын 8-ны өдрийн хуралдаанаар ОХУ-ын Москва, Владивосток хот, БНХАУ-ын Бээжин, Тяньжин хот, Япон Улсын Токио хот, БНСУ-ын Сөүл хот, Европын холбооны төв-Бельгийн Вант Улсын Брюссель хотод Монгол Улсын Худалдааны төлөөлөгчийн газрыг 2018-2024 онд үе шаттай байгуулах төлөвлөгөөг хэлэлцэн баталлаа. Ингэснээр Монгол Улс худалдааны голлох түнш орнуудад Худалдааны төлөөлөгчийн газар ажиллуулж байсан уламжлалаа 20 гаруй жилийн дараагаар сэргээх эхний алхамыг хийлээ.

Дээр дурдсан хотуудад Худалдааны төлөөлөгчийн газар байгуулах нь ОХУ, БНХАУ, Япон Улс, БНСУ, Европын холбооны орнуудтай хийх худалдааны эргэлтийг нэмэгдүүлэх, экспортын бүтээгдэхүүний нэр төрлийг олшруулах, транзит тээврийн зорилгоор ашиглах боомтын тоог нэмэгдүүлэх, тээвэр ложистикийн төслүүд хэрэгжүүлэх зэрэг ажлыг идэвхтэй урагшлуулах, эдгээр улстай худалдааны харилцаа хөгжүүлж буй аж ахуйн нэгжүүдийн эрх ашгийг хамгаалах, үйл ажиллагаанд нь дэмжлэг үзүүлэх боломж нэмэгдэх юм.


Монгол Улс хилийн чанадад худалдааны төлөөлөгчийн газрууд нээнэ  
Үзсэн: 231 Mongolian National Broadcaster  

Сэтгэгдэл бичих:

АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.
1000 Сэтгэгдэлээ бичнэ үү

Бидэнтэй нэгдээрэй