Шууд Chart

Ерөнхий сайдад Япон Улсын Элчин сайд бараалхлаа

2018-08-29 09:29:05

Монгол Улсын Ерөнхий сайд У.Хүрэлсүх Япон Улсаас манай оронд суугаа Онц бөгөөд Бүрэн эрхт Элчин сайд Такаока Масато, Японы Ерөнхий сайдын тусгай зөвлөх Кэнтаро Соноүра нарыг энэ сарын 28-ны өдөр хүлээн авч уулзлаа.

Монгол Японы найрсаг харилцаа хамтын ажиллагаа жилээс жилд өргөжин тэлж байгаа төдийгүй төрийн өндөр дээд хэмжээний харилцан айлчлал хэдийн тогмолжсон. Энэ удаад ч мөн Японы Ерөнхий сайд Абе Шинзо Монгол Улсын Ерөнхий сайд У.Хүрэлсүхийг эх орондоо хүлээн авч, албан ёсны айлчлал хийхийг урихаар зэхэж буйг элчин сайд болон Японы ерөнхий сайдын тусгай зөвлөх дуулгав.

Монгол, Японы дипломат харилцаа хөгжихийн зэрэгцээ Зүүн Хойд Азийн улс, орнуудын тогтвортой, аюулгүй байдлыг хангах тал дээр болон Ази Номхон Далайн бүс нутгийн асуудалд ижил байр суурь баримталдаг нь бидний хамтын ажиллагаанд ч эерэг тусгалаа олдог хэмээн талууд санал нэгдэв. Мөн Улаанбаатарын  яриа хэлэлцээг Монгол улс өөрийн оронд зохион байгуулж дэмжлэг үзүүлж байсан нь бидний ойр дотно харилцааны илрэл гэдгийг Элчин сайд тодотгож байв.

Хамтын ажиллагаа олон салбарт өргөжин хөгжиж, түүний зэрэгцээ манай хоёр орны ард түмэн харилцан бие биедээ тусалж, байгалийн гамшиг тохиолдсон үед ч дэм үзүүлж байгаа нь Засгийн газрын түвшин төдийгүй иргэд хоорондын чин сэтгэлийн харилцаа батжиж байгааг илтгэж байна гэв.

Ерөнхий сайд У.Хүрэлсүх ОУВС-ийн өргөтгөсөн хөтөлбөрийн хүрээнд Япон Улсын Засгийн газраас 850 сая ам.долларын дэмжлэг үзүүлсэнд талархал илэрхийлсний хариуд бэрхшээлийг даван туулж, эдийн засгаа тогтворжуулж улмаар өсгөж байгаа Монгол Улсын Засгийн газрын үйл ажиллагаагаар бахархаж байна гэдгээ илэрхийлэв.


Ерөнхий сайдад Япон Улсын Элчин сайд бараалхлаа  
Үзсэн: 187 Mongolian National Broadcaster  

Сэтгэгдэл бичих:

АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.
1000 Сэтгэгдэлээ бичнэ үү

Бидэнтэй нэгдээрэй