Шууд Chart

Засгийн газар хоорондын байнгын зөвлөлдөх ажлын хэсгийн IV хуралдаан болов

2018-08-31 12:11:27

Монгол Улсын Гадаад харилцааны яам, БНХАУ-ын ӨМӨЗО-ны Ардын засгийн газар хоорондын Байнгын зөвлөлдөх ажлын хэсгийн IV хуралдаан 2018 оны 8 дугаар сарын 29-30-ны өдрүүдэд Улаанбаатар хотноо амжилттай болов. Хуралдаанд Монгол Улсын Гадаад харилцааны яамны Төрийн нарийн бичгийн дарга Д.Даваасүрэн, БНХАУ-ын ӨМӨЗО-ны Дэд тэргүүлэгч Ай Лихуа нар хоёр талын төлөөлөгчдийг тэргүүлж оролцов.

Тус хуралдаанаар хоёр талын худалдаа, эдийн засаг, хөдөө аж ахуй, дэд бүтэц, хилийн боомт, аялал жуулчлал, соёл хүмүүнлэгийн хамтын ажиллагаа зэрэг өргөн хүрээний асуудлаар санал солилцож, хуралдааны дүнгээр Протокол байгуулав. Тухайлбал, талууд хоёр улсын худалдааны эргэлтийг 2020 он гэхэд 10 тэрбум ам.долларт хүргэх зорилтыг хэрэгжүүлэх хүрээнд идэвхтэй хамтран ажиллах, ӨМӨЗО-ны Хөххотод “Монголд үйлдвэрлэв” худалдааны төв байгуулахад хамтран ажиллах, “Монгол-Хятадын Экспо” арга хэмжээг 2019 онд хамтран зохион байгуулахаар  тохиролцож, Монголын жижиг, дунд аж ахуйн нэгжүүд ӨМӨЗО-ны Ардын засгийн газраас зохион байгуулдаг форум, үзэсгэлэн худалдаанд оролцоход хятадын талаас дэмжлэг, хөнгөлөлтийг үзүүлэхээ илэрхийлэв.

Түүнчлэн хоёр талын төмөр зам, авто замын төслүүдийн бүтээн байгуулалтыг урагшлуулах, хилийн боомтын дэд бүтцийг сайжруулах, нэвтрүүлэх чадавхийг дээшлүүлэх чиглэлээр ойрын хугацаанд авах арга хэмжээний талаар тохиролцов. Байнгын зөвлөлдөх ажлын хэсгийн дараагийн хуралдаан 2020 онд Хөххотод болно.


Засгийн газар хоорондын байнгын зөвлөлдөх ажлын хэсгийн IV хуралдаан болов  
Үзсэн: 167 Mongolian National Broadcaster  

Сэтгэгдэл бичих:

АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.
1000 Сэтгэгдэлээ бичнэ үү

Бидэнтэй нэгдээрэй