Шууд Chart

Хос тангараг өргөсөн алба хаагчдын эмнэлэг 85 жилийн ойгоо тэмдэглэлээ

2018-10-25 16:09:01

Цэргийн мөрдөстэй хэрнээ цагаан халаадтай эмч, эмнэлгийн ажилтнууд үүрэг гүйцэтгэдэг Төрийн тусгай алба хаагчдын нэгдсэн эмнэлэг (ТТАХНЭ)-ийн 85 жилийн ой өнөөдөр тохиож байна. Тус эмнэлгийн албан хаагчид цэргийн болон эмчийн хос тангараг өргөдөг бөгөөд шүүх, прокурор, цагдаа, хилийн цэрэг, гааль, онцгой байдал, шүүхийн шийдвэр гүйцэтгэх байгууллага, шүүхийн шинжилгээний байгууллагын алба хаагчид, тэдний гэр бүлийнхэн, чөлөөнд гарсан ахмадууд зэрэг нийт 130 гаруй мянган хүнд эрүүл мэндийн тусламж хүргэдэг. Үүнээс гадна нийслэлийн Чингэлтэй дүүргийн 110 мянга орчим иргэнд мэс заслын тусламж, үйлчилгээ үзүүлдэг.

Төрийн тусгай алба хаагчид эх орны хилийн халдашгүй дархан байдал, иргэдийн амар тайвныг хамгаалдаг бол ТТАХНЭ-ийн эмч, ажилтнууд дээрх албан хаагчдын амь нас, эрүүл мэндийн манаанд зогсох үүрэгтэй билээ.

ТТАХНЭ-ийн баярын хурал, ёслолын үйл ажиллагаа 350 хүний суудалтай, лед дэлгэцтэй, тус эмнэлгийн шинээр байгуулагдсан хурлын зааланд өнөөдөр боллоо. Энэ үеэр ТТАХНЭ-ийн захирал, анагаах ухааны доктор, дэд профессор, дэд хурандаа Л.Баттөр “Түүхт 85 жилийн ойн хүрээнд манай хамт олон маш олон ажлыг хийж амжууллаа.  Тухайлбал, эмнэлгийн тоног төхөөрөмжийн бүрэн шинэчлэлт, суурилуулалт, сургалтын ажлаа бүрэн хэрэгжүүлж дуусгасан. Мөн гадаад, дотоодын хамтын ажиллагааны хүрээнд олон улсын Ротари клубтэй хамтран улсын эмнэлгүүдээс анх удаагаа Эрүүл мэндийг дэмжих төвтэй болсон. Түүнчлэн БНСУ-ын Кошин их сургуулийн эмнэлэгтэй хамтран 300 сая орчим төгрөгийн хөрөнгө оруулалтаар Телемедициний төв байгуулсан. Мөн манай эмнэлэг 85 жилийн ойгоо угтахдаа технологийн шинэчлэлээс гадна чанарын дэвшилт хийж ISO 9001:2015 стандартыг нэвтрүүлж, батламжаа гардан авсан” гэв.

Тус эмнэлгийн 85 жилийн ойн баярын хуралд УИХ-ын гишүүн, Хууль зүй, дотоод хэргийн сайд Ц.Нямдорж болон Эрүүл мэндийн дэд сайд Д.Бямбасүрэн тэргүүтэй эрхэм оролцсон. Баярын хурлын нээлтийн үеэр Хууль зүй, дотоод хэргийн сайд Ц.Нямдорж ТТАХНЭ-ийн төлөө 85 жилийн хугацаанд  хичээж ажилласан тус танхимд хүрэлцэн ирсэн болон бүх ахмад ажилтанд нэн тэргүүнд баярын мэнд дэвшүүллээ. Мөн тэдний хойчийг залгамжлан, энэ эмнэлэгт ажиллаж буй нийт алба хаагчдад баярын мэнд хүргэсэн юм. Түүнчлэн харьяа яамнаас нь тус эмнэлгийг сайтар дэмжиж ажиллах болно гэдгээ хэлсэн.

Харин Эрүүл мэндийн дэд сайд Д.Бямбасүрэн “ТТАХНЭ эмнэлгийн хамт олонд болон 85 жилийн түүхийг бичилцэж, бүтээхэд бүх сэтгэл зүрхээ зориулсан ахмад эмч, эрүүл мэндийн ажилтнуудад баярын мэнд хүргэе. ТТАХНЭ барилга, тоног төхөөрөмж, мэргэжлийн боловсон хүчинтэй. Ийм эмнэлэг бий болсон нь манай эрүүл мэндийн салбарын бас нэгэн өнгө төрх юм” гэлээ. Тэрбээр мөн УИХ-ын гишүүн, Эрүүл мэндийн сайд Д.Сарангэрэлийн мэндчилгээг ахмад эмч, ажилтнууд болон одоо ажиллаж буй алба хаагч эмч, эмнэлгийн ажилтан нарт уламжлав.   

Т.Болор-Эрдэнэ












Хос тангараг өргөсөн алба хаагчдын эмнэлэг 85 жилийн ойгоо тэмдэглэлээ  
Үзсэн: 805 Mongolian National Broadcaster  

Сэтгэгдэл бичих:

АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.
1000 Сэтгэгдэлээ бичнэ үү
Ch.ganbaatar [103.229.121.xxx] 2018-10-26 22:14
Ajliin mini anhnii garaa ene baiguullagaas ehelj bilee. Tuuht 70 jiliin oin hundetgeliin kontsertod oroltsoj bailaa. Emnelgiin hamt olondoo tuuht oin bayriin mend hurgie
zochin [112.72.11.xxx] 2018-10-26 10:17
TTAHNE-iin udirdlaga, emch, ajiltanuudad bayarin mend hurgen ajlin amjilt husye
Зочин [202.9.41.xxx] 2018-10-26 10:11
тус эмнэлгийн нийт хамт олонд чин сэтгэлээсээ баяр хүргэж ажлын өндөр амжилт хүсэж байна.

Бидэнтэй нэгдээрэй