Шууд Chart

Г.Доржрагчаа: Цагдаа байгаа газар нүгэлтэн үгүй гэдэг үгийг хэлэх дуртай

2019-03-02 10:38:51

“Цагдаа” эмхтгэлийнхээ “Харих болоогүй аав” булангийнхаа энэ удаагийн зочноор Дорноговь аймаг дахь цагдаагийн газрын Эрүүгийн тасгийн мөрдөгч, цагдаагийн ахмад Г.Доржрагчааг урьж ярилцлаа.

- Анх цагдаагийн байгууллагад хэрхэн орж ажиллах болсон бэ?

- Би 2007 онд Дорноговь аймгийн Сайншанд сумын 1 дүгээр 11 жилийн сургуулийг онц дүнтэй төгсөн, Цагдаагийн академийн үндсэн ангид элсэн суралцаж төгсөөд, төрийн томилолтоо аваад Дорноговь аймгийн Мандах сумын хэсгийн төлөөлөгчөөр томилогдон 3 жил ажилласан. Мөн аймгийн Өргөн сумын хэсгийн төлөөлөгчөөр ажиллаж байгаад цагдаагийн газрын эрүүгийн цагдаагийн тасагт эрүүгийн төлөөлөгч, эрүүгийн мөрдөгчөөр ажиллаж байна.

Миний томилогдсон сум тог цахилгаангүй байсан ч ажил үүргээ гүйцэтгэхэд хэцүү зүйл байгаагүй. Харин ч хэсгийн төлөөлөгчөөр ажилласнаараа бусад албаны гүйцэтгэх чиг үүргийн уялдаа холбооог сайн ойлгож, бие даан үүрэг гүйцэтгэх чадвар, амьдралын ухаанд суралцсан гэж боддог. Манай гэр бүл хамаатан садан дунд энэ төрлийн ажил мэргэжилтэй хүн байхгүй ч би атгасан гар шиг эвтэй, сайхан хамт олонтой байдаг учраас энэ шийдвэртээ сэтгэл хангалуун байдаг. 

- Цагдаагийн ажил албаараа хэрхэн бахархдаг бэ?

- Хүүхэд бага байхдаа өөрсдийнхөө ирээдүйг төсөөлж, өөрсдийгөө том мэтээр мэргэжлүүдээ дүрслэн хэлж байдаг. Түүний нэгэн адилаар би 5 дугаар ангид байхаасаа л цагдаа болно гэж бодож, ангийнхаа хүүхдүүдэд байнга ярьдаг байсан. Хүсэл мөрөөдлөө биелүүлж энэ нэр хүндтэй, сайхан албанд зүтгээд найман жил болж байна. Өнөөгийн нийгэмд цагдаагийн ажил болон алба хаагчийн талаар цахим хуудсаар сөрөг талаас нь их нийтлэх болсон. Гэхдээ бид өдөр болгон сайн үйлс хийж байдгийг мэддэг. Мөн цагдаагийн нийт алба хаагчид ч мэддэг. Тиймдээ ч би энэ албаараа бахархдаг. Цагдаа байгаа газар нүгэлтэн үгүй гэж сайхан үг байдаг. Аливаа газар цагдаагийн алба хаагч байгаа цагт ард иргэд маань тайван амгалан ажиллаж, сэтгэл тэнүүн нуруу тэнэгэр алхаж байдаг. Өөрийнхөө төлөө бус ард иргэдийнхээ амгалан тайван байдлыг хамгаалдаг болохоор энэ албаараа би бахархдаг юм.

- Гэр бүлийнхээ талаар бидэнд хуучилна уу?

- Миний  хань АШУҮИС-ийг уламжлалт анагаах ухааны их эмч мэргэжлээр төгссөн. Эзэмшсэн мэргэжлээ бататгаж анагаах ухааны доктор эрхэм хүндтэй боловсролын цолыг хүртэж одоо мэргэжлээрээ сурган хүмүүжүүлэх чиглэлээр 10 гаруй жил зүтгэж яваа. Ажил амьдралын маань найдвартай ар тал, итгэлт ханиараа бахархдаг. Хүү маань бага сургуулийн сурагч. Мэдээж цаг наргүй албанд, хоёргүй сэтгэлээр зүтгэж явдаг бид өмөг, түшиг болсон сайн гэргий нарынхаа ачаар л ажлаа санаа зовох зүйлгүй хийдэг шүү дээ. Гэргий маань ажилсаг, аливаа зүйлд их уужуу тайван ханддаг сайхан бүсгүй бий.

- Эрүүгийн мөрдөгч гэж үзэл бодол, үг хэллэг болон маш олон зүйлээр ажил мэргэжилээсээ шалтгаалаад тэр бүр ил байдаггүй учраас албаныхаа онцлог бахархалын талаар?

- Цагдаагийн байгууллагын зүрх, тархи болсон алба нь  Эрүүгийн алба гэж хүн бүхэн ярьдаг. Би үүнтэй санал нэг байдаг юм. Шинэ хуулийн зохицуулалтаар одоогийн Эрүүгийн мөрдөгч нар хэрэг бүртгэлтийн ажиллагаа явуулж, эзэнгүй гэмт хэргийг шалгаж байгаа. Тиймээс нутаг дэвсгэр хариуцсан эрүүгийн мөрдөгч нар хүнтэй харилцах харьцаа болон үг хэллэгийн хувьд иргэдийн сэтгэлзүйд нөлөөлж ажиллах шаардлага гардаг. Миний хувьд эрүүгийн мөрдөгч хүн иргэдтэй хамгийн ойр ажиллаж, гэмт этгээдүүдийн сэтгэлзүйн байдалд тулгуурлан гэмт хэргийг илрүүлэх чадвартай байх ёстой гэж боддог. Эрүүгийн алба бол алдаа гаргах эрхгүй байдаг учраас хувь хүний хүмүүжлийг нягт, нямбай, үнэнч зан чанартай болгож төлөвшүүлдэг сайхан алба шүү дээ.

- Таны ажил мэргэжилдээ баримталдаг зарчим юу бэ?

- Цагдаагийн алба хаагчид маань аливаа ажлыг өөрөөсөө үнэрттэл хийх хэрэгтэй, Энэ бол миний ажилдаа баримталдаг зарчим. Би цагдаагийн сургуульд  дөрвөн жил суралцахдаа хувь хүний төлөвшил илүү их олж авсан гэж боддог.  Мэдээж боловсрол чухал ч хүн байх нь бас чухал шүү дээ.  Ер нь манай алба хаагчид бодох хэрэгтэй хүнд амжилт хүсье, баярлалаа, уучлаарай гэдэг үгнүүдийг харамгүй хэлж байвал тухайн хүнээс гэрэл цацраад л байдаг. Нар хэзээ ч хэн нэгнийг ялгаж гэрлээ тусгадаггүйтэй адил гэсэн үг.

- Таныг бөх барилддаг гэж сонсож байсан.

- Тиймүү /инээв/ Би өвөөгийнхөө хажууд бол юу байхав дээ. Сурагч байхдаа бол нэлээн хичээдэг байсан. Миний өвөө Б.Чимэдбазар 1969 онд Сүхбаатар аймгийн баяр наадамд түрүүлж, Аймгийн арслан цол хүртэж байсан. Би бага наснаасаа үндэсний бөхийн спортоор хичээллэж чамгүй амжилтуудыг гаргаж байсан. Цагдаагийн газарт ажиллаж байсан үе үеийн ахмад буурлууд, одоо ажилаж байгаа нийт бие бүрэлдэхүүн болон тэдний ар гэрийнхэнд Дорноговь аймаг дахь Цагдаагийн газрын түүхт 80 жилийн ойн баярын мэндийг дэвшүүлж, ажлын амжилт, амьдралын сайн сайхан бүхнийг хүсэн ерөөе.

- Эрүүгийн цагдаагийн албаны нүд хурц, чих соргог, цагаан шонхор лугаа цог хийморь үргэлж мөнх оршиг.

- Танд баярлалаа. Ажилд нь амжилт хүсэж байна.


Г.Доржрагчаа: Цагдаа байгаа газар нүгэлтэн үгүй гэдэг үгийг хэлэх дуртай  
Үзсэн: 207 Mongolian National Broadcaster  

Сэтгэгдэл бичих:

АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.
1000 Сэтгэгдэлээ бичнэ үү

Бидэнтэй нэгдээрэй