Шууд Chart

3х3 төрлийн ДАШТ-ий медальтнууд өнөөдөр тодорно

2019-06-07 09:22:02

Монгол Улсад анх удаа болж буй сагсан бөмбөгийн 3х3 төрлийн 18 хүртлэх насны ДАШТ-ий медальтнууд өнөөдөр тодорно.

Д.Сүхбаатарын талбайд болж буй “FIBA 3×3 U18 World Cup 2019” тэмцээнд эрэгтэй, эмэгтэй тус бүр 20 баг өрсөлдөж байгаагаас өчигдөр шөвгийн наймд өрсөлдөх багууд тодорсон.

Монгол Улсын эрэгтэй баг “С” хэсэгт АНУ-ын багийн араас хоёрдугаар байраар шалгарч цааш өрсөлдөх эрхийг авсан. Манай сагсчид өчигдөр Гүржийг 18-16-аар хожиж, АНУ-ын багт /20:10/ хожигдсон ч гурван хожилтойгоор шилдэг наймд үлдсэн юм. Өмнөх тоглолтод Латвийг 20:16-аар, Беларусыг 21:15-аар хожсон манай хөвгүүд өчигдрийн тоглолтод Гүржийг хожсоноор цааш өрсөлдөх эрхээ авч чадлаа.

“С” хэсгийг АНУ-ын баг дөрвөн хожилтойгоор тэргүүлж, Монгол Улсын баг удаалсан. Манай залуус өнөөдөр “А” хэсгийг тэргүүлсэн Туркийн багтай тоглох бөгөөд энэ тоглолт 13:00 цагаас болох хуваарьтай байна. Харин АНУ-ын баг Италийн багтай таарчээ.

18 хүртэлх насны ДАШТ-ий эрэгтэй багуудаас шөвгийн наймд Турк, Монгол, Аргентин, Укриан, ОХУ, Румын болон АНУ, Италийн багууд үлдээд байна.

Монгол Улсад анх удаа багийн төрлөөр ДАШТ болж байгаатай холбогдуулан Ерөнхийлөгч, Ерөнхий сайд тэмцээнд оролцогчдод тусгайлан баяр хүргэлээ.

Зургадугаар сарын 3-ны өдөр болсон нээлтийн арга хэмжээнд Монгол Улсын Ерөнхий сайд У.Хүрэлсүх оролцож, баг, тамирчид, зохион байгуулагч нарт Засгийн газрын нэрийн өмнөөс болон хувиасаа спортын өндөр амжилтыг хүссэн.

Өчигдөр Ерөнхийлөгч Х.Баттулга Олон улсын сагсан бөмбөгийн холбооны 3х3 төрөл хариуцсан гүйцэтгэх захирал Алекс Санчесийг хүлээн авч уулзаж, олон улсын нэр хүнд бүхийн тэмцээнийг зохион байгуулахад хичээл зүтгэл гаргасанд нь талархал илэрхийлж, Улаанбаатар хотод болох Азийн хүүхдүүд 2020 олон улсын спортын их наадамд хамтран ажиллах, олон улс орны тамирчдыг оролцуулах асуудлаар ярилцаж, санал солилцжээ.

18 хүртэлх насны ДАШТ-д өрсөлдөж буй Монгол Улсын багт А.Батхуяг, Л.Авирмэд, Ө.Пэрэнлэйжамц, Ш.Энхийн-Од нар тоглож байна. Дасгалжуулагчаар С.Тулга тэргүүтэй дасгалжуулагчид ажиллаж байгаа бөгөөд манай залуус ДАШТ-ий “С” хэсэгт гурван хожил, нэг хожигдолтойгоор цааш өрсөлдөх эрхийг авлаа.

Д.Сүхбаатарын талбайд болж буй буй ДАШТ-ий өнөөдрийн тоглолт 13:00 цагаас Монгол, Туркийн багуудаар эхэлнэ.

Нийтэлсэн: У.Баярсайхан

3х3 төрлийн ДАШТ-ий медальтнууд өнөөдөр тодорно  
Үзсэн: 174 Mongolian National Broadcaster  

Сэтгэгдэл бичих:

АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.
1000 Сэтгэгдэлээ бичнэ үү

Бидэнтэй нэгдээрэй