Шууд Chart

“Цэвэр агаартай өдөр”-т эрүүл мэндийн байгууллагууд үзлэг, шинжилгээ хийж байна

2019-09-14 13:58:19

Нийслэлийн Засаг даргын Тамгын газраас энэ сарын 14, 15-нд “Цэвэр агаартай-aвтомашингүй өдөр”-ийг зохион байгуулахаар болсон билээ. Энэ хүрээнд “Цэвэр агаартай өдөр”-ийн нэгдсэн арга хэмжээний нээлт өнөөдөр Д.Сүхбаатарын талбайд боллоо.

Өдөрлөгийн үйл ажиллагаанд нийт 40 гаруй аж ахуйн нэгж, байгууллагууд оролцож буй бөгөөд гэр болон байшингийн дулаалгын материал, халаалтын шийдлүүд, эко автомашин, шинэ дэвшилтэт технологи бүхий бүтээгдэхүүнээ танилцуулж байна.

Мөн төрийн байгууллагуудын зүгээс Засгийн газрын “Түүхий нүүрс хэрэглэхийг хориглох тухай” 62 дугаар тогтоолын хүрээнд хэрэгжүүлж буй арга хэмжээ, томоохон ажлуудаа танилцуулж, иргэдэд мэдээлэл хүргэж байгаа юм.

Нийслэлийн Засаг дарга бөгөөд Улаанбаатар хотын захирагч С.Амарсайхан өдөрлөгийн үеэр утаагүй зуух болон сайжруулсан түлшний чанар, хэрэглээний явцтай газар дээр нь үзэж танилцсан бөгөөд иргэдийн санал сэтгэгдлийг сонсож, мэдээлэл солилцлоо.

Тэрбээр “Нийслэл хот гэх нэгэн нутаг дэвсгэрт оршин сууж байгаа иргэд маань эрүүл, аюулгүй, цэвэр, тав тухтай орчинд амьдрах эрхтэй. Ялангуяа агаар, орчны бохирдлоос эрүүл мэндээ хамгаалахын тулд орчин тойрны хог хаягдлаа цэвэрлэж, хорт утаа ялгаруулах бүхнээс хол байхыг чухалчлан энэ арга хэмжээнд идэвхи санаачлагатай оролцох хэрэгтэй” хэмээн хэллээ.

Түүнчлэн “Цэвэр агаартай-aвтомашингүй өдөр”-ийн нэгдсэн арга хэмжээнд нийслэлийн эрүүл мэндийн байгууллагууд идэвхи санаачлагатай оролцож байгаа юм. Тухайлбал, өнөөдөр НЭМГ-ын харьяа нийслэлийн Баянгол, Сүхбаатар дүүргийн эрүүл мэндийн төвийн эмч, мэргэжилтнүүд өдөрлөгт оролцож буй иргэдэд мэдрэл, чих хамар хоолой, зүрх судас, цусны сахар үзэх, биеийн жингийн индекс тодорхойлох зэрэг үзлэг, шинжилгээг хийж байна.

Мөн зөв хооллолт, халдварт болон халдварт бус өвчнөөс урьдчилан сэргийлэх зөвлөмжөөс гадна гадаад болон дотоод орчны агаарын бохирдлын нөлөөллөөс эрүүл мэндээ хэрхэн хамгаалах талаар зөвлөгөө, мэдээллийг хүргэн ажиллаж байна.

Өдөрлөгийн хоёр дахь өдөр буюу “Цэвэр агаартай-aвтомашингүй өдөр”-өөр нийслэлийн Баянзүрх, Чингэлтэй дүүргийн эрүүл мэндийн төвийн эмч, мэргэжилтнүүд иргэдэд үзлэг, шинжилгээ хийх юм байна.

 

“Цэвэр агаартай өдөр”-т эрүүл мэндийн байгууллагууд үзлэг, шинжилгээ хийж байна  
Үзсэн: 299 Mongolian National Broadcaster  

Сэтгэгдэл бичих:

АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.
1000 Сэтгэгдэлээ бичнэ үү

Бидэнтэй нэгдээрэй