Шууд Chart

Эквадор улсад 714 хүнийг баривчлан саатуулжээ

2019-10-10 15:58:59

Эквадор улсад болж байгаа засгийн эсрэг тэмцлийн үеэр цагдаа нар, жагсагчдын дунд мөргөлдөөн гарч, 400 гаруй хүн эмнэлгийн тусламж авчээ. Гэмтэж бэртсэн хүмүүсийн 86 нь цагдаагийн ажилтан гэж Эквадорын Дотоод хэргийн сайд Мария Паула Ромо лхагва гарагт мэдээлсэн байна.

Одоогийн байдлаар мөргөлдөөний үеэр амиа алдсан хүн байхгүй гэдгийг дуулгасан юм. Мөн эсэргүүцлийн явцад 714 хүнийг баривчлан саатуулжээ.

Эсэргүүцэгчид газрын тосны хэд хэдэн ордыг эзлэн авсны улмаас “Транс Эквадорын газрын тос дамжуулах систем”-ийн үйл ажиллагааг зогсоосон тухай Эрчим хүч, сэргээгдэх бус нөөцийн яамнаас мэдээлсэн байна.

Газрын тосны олборлолт энгийн үеэс 30 хувиар буурсантай холбогдуулан одоогийн байдлаар 12.8 сая ам.долларын хохирол учраад байна гэж мэдээлжээ.

Түүнчлэн Эквадорын Портовьехо хотод эсэргүүцлийн арга хэмжээний үеэр хэдэн арван хоригдол шоронгоос оргосон байна. Цагдаа нар 50 гаруй хоригдлыг барьж авчээ. Одоо оргосон гэмт хэрэгтнүүд байгаа эсэхийг тогтоохоор ажиллаж байна гэж хэвлэлүүдэд мэдээлжээ.

Эквадорын Ерөнхийлөгч Ленин Морено энэ сарын 3-наас дизель түлш, шатахууны хөнгөлөлтийг цуцлах шийдвэр гаргасны дараа тус улсад түлшний үнэ 120 гаруй хувиар өссөн юм. Ингээд улс орон даяар эсэргүүцэл өрнөж, зарим хотод эмх замбараагүй байдал дэгдсэн байна.

Нөхцөл байдалтай холбогдуулан Ленин Морено улс орондоо онц байдал зарласнаас гадна боловсролын бүх байгууллагыг тодорхойгүй хугацаагаар хааж, парламентын үйл ажиллагааг зогсоожээ.

Нийтэлсэн: Mонголын радио

Эквадор улсад 714 хүнийг баривчлан саатуулжээ  
Үзсэн: 126 Mongolian National Broadcaster  

Сэтгэгдэл бичих:

АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.
1000 Сэтгэгдэлээ бичнэ үү

Бидэнтэй нэгдээрэй