Шууд Chart

Монгол Улсын төлөөлөгчид "Умардын эдийн засгийн хамтын ажиллагааны форум"-д оролцов

2019-12-13 17:27:26

БНСУ-ын Ерөнхийлөгчийн дэргэдэх Умардын Эдийн засгийн хамтын ажиллагааны Хорооноос 2019 оны 12 дугаар сарын 4-5-ны өдрүүдэд Сөүл хотноо “Умардын эдийн засгийн хамтын ажиллагааны Олон улсын Форум”-ыг зохион байгуулав.

Форумд АНУ, БНХАУ, БНСУ, ОХУ, Казахстан, Монгол, Киргизстан, Япон зэрэг бүс нутгийн улс орнуудын төр, засгийн төлөөлөгчид, нэр хүндтэй судлаачид, мөн Азийн дэд бүтцийн хөрөнгө оруулалтын банк (AIIB), Азийн хөгжлийн банк (ADB) зэрэг олон улсын санхүүгийн байгууллагын төлөөлөгчид оролцов. Энэ удаагийн Форумын хуралдаанаар бүс нутгийн эдийн засгийн интеграцийн өнөөгийн байдал болон хэтийн төлөв, Ерөнхийлөгч Мүн Жэ Ин-ий санаачилсан Шинэ Умардын бодлого, Зүүн хойд Азийн олон талт харилцаа, санхүү, хөрөнгө оруулалт, дэд бүтэц, ложистик, дэвшилтэт аж үйлдвэрийн салбарын хамтын ажиллагаа зэрэг өргөн хүрээтэй асуудлаар хэлэлцүүлэг болж, санал солилцов.

Форумд Монгол Улсын Ерөнхийлөгчийн бүс нутгийн эрчим хүчний хамтын ажиллагаа хариуцсан бие төлөөлөгч Б.Бямбасайхан тэргүүтэй төлөөлөгчид оролцов. Тэрбээр Форумын нэгдсэн хуралдаанд үндсэн илтгэл тавьж, оролцогчдын сонирхсон асуултад хариулав.

Манай төлөөлөгчийн тавьсан илтгэлд Зүүн хойд Азийн бүс нутгийн эрчим хүчний худалдааны нэгдсэн сүлжээ байгуулах, хөрөнгө оруулалтын төслүүдийн техник, эдийн засгийн нарийвчилсан судалгаа хийх, цахилгаан эрчим хүч үйлдвэрлэх, дамжуулах, худалдах хэрэгцээ, шаардлагын талаар дэлгэрэнгүй танилцуулж, Монгол Улс бүс нутгийн улс орнуудад хямд, найдвартай цахилгаан эрчим хүч нийлүүлэх өргөн боломж буйг онцлон тэмдэглэв.


Монгол Улсын төлөөлөгчид "Умардын эдийн засгийн хамтын ажиллагааны форум"-д оролцов   
Үзсэн: 238 Mongolian National Broadcaster  

Сэтгэгдэл бичих:

АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.
1000 Сэтгэгдэлээ бичнэ үү

Бидэнтэй нэгдээрэй