Шууд Chart

"Лозанн-2020" цахим хуудас Монголын цанатай гүйгчдийг онцлов

2020-01-20 13:09:11

Тус сайтад "Монголын баг тамирчид "Лозанн-2020" олимпын эрхийг хүртэхэд Швейцар улсын мэргэжилтэн Паскал Гертш ихээхэн хувь нэмэр оруулжээ. Өдгөө 74 настай тэрбээр Швейцар улсын цанын шигшээ багт 12 жил ажилласан туршлагатай бөгөөд анх 2013 онд сайн дурын, туслалцааны ажлаар Монгол Улсад ирсэн юм.

Ингэхдээ Монголд цанын спортыг түлхүү хөгжүүлж, өсвөрийн цаначдыг бэлтгэн өөрийн улсад зохион байгуулагдах "Лозанн-2020" Залуучуудын өвлийн олимпын наадамд амжилттай оролцуулахыг зорьжээ.

Тэрбээр өнгөрсөн хугацаанд Монголд 20 гаруй удаа ирэхдээ 70 мянга гаруй км аялан, Хэнтий аймгийн Биндэр сумын нутаг дэвсгэрт цанын олон улсын стандартад нийцэх замыг байгуулахыг зорьсон бөгөөд Олон улсын цанын холбооны гэрчилгээ гаргуулсан юм.

Мөн 2017 оноос Монголын гүйлтийн цанын өсвөрийн тамирчдын ур чадварыг нэмэгдүүлэх тал дээр ихээхэн анхаарч, 650 гаруй цана, бусад хэрэгсэл материалаар хангажээ.

Түүнчлэн Паскал Гертш өнгөрсөн онд "Лозанн-2020" олимпын наадмын "цагаан" замаар Монгол тамирчдыг уралдуулах зорилго тавьж, Монголын зургаан тамирчныг Швейцар, Франц зэрэг оронд бэлтгэл сургуулилт хийлгэж, олон улсын тэмцээнүүдэд оролцоход туслалцаа үзүүлжээ.

Ташрамд дуулгахад, МҮОХ нь ОУОХ-ны Эв санааны нэгдлийн хамтын ажиллагааны хүрээнд "Лозанн-2020" олимпын наадмын гүйлтийн цанын төрөлд эрх авах зорилгоор өсвөрийн 11 тамирчныг өнгөрсөн оны долоодугаар сард Паскал Гертш болон Францын мэргэжилтэн Ян Логан нарын удирдлага дор бэлтгэл сургуулилтад хамруулсан юм" гэжээ.









Нийтэлсэн: Т.Болор-Эрдэнэ

"Лозанн-2020" цахим хуудас Монголын цанатай гүйгчдийг онцлов  
Үзсэн: 910 Mongolian National Broadcaster  

Сэтгэгдэл бичих:

АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.
1000 Сэтгэгдэлээ бичнэ үү
Зочин [127.0.0.xxx] 2020-01-21 10:10
Энэ хүн хүн бүрт стандартын өндөр үнэтэй цана бэлэглэсэн гэсэн шүү
Зочин [127.0.0.xxx] 2020-01-21 10:09
Сайн явж байна уу,
Зочин [127.0.0.xxx] 2020-01-20 14:38
good job

Бидэнтэй нэгдээрэй