Шууд Chart

Анастасия Цэдэнбал: Миний эмээ амьдралынхаа туршид өвөөгийн баруун гар, найдвартай түшиг тулгуур байсан

2020-02-05 09:57:14

Энэ өдөр БНМАУ-ын Баатар, Хөдөлмөрийн баатар, Маршал Ю.Цэдэнбал агсны хүү Зоригийн охин Анастасия(Ану Дари) Цэдэнбал хайрт эмээдээ зориулж нэгэн дурдатгал бичжээ.

Тэрбээр, “2020 оны хоёрдугаар сарын 4-ний өдөр Монгол Улсын удирдагч асан Юмжаагийн Цэдэнбалын гэргий, Анастасия Ивановна Цеденбал-Филатовагийн мэндэлсний 100 жилийн ой тохиож байна.

Рязань мужийн Сапожок тосгоны эгэл жирийн бүсгүй Москвад боловсрол эзэмшээд, дайны дараа найз нөхдийндөө зочилж байхдаа маршал Чойбалсангийн баруун гар, тухайн үеийн Монгол Улсын удирдагч, залуу Юмжаагийн Цэдэнбалтай танилцжээ. ЗХУ-ын дээд удирдлагын зөвшөөрлөөр/гадаад хүмүүстэй гэр бүл болохыг хориглосон байв/ нөхөрт гарч, хүчирхэг хойд хөршийн тусламжтайгаар феодализмаас социализм руу хийх үсрэлтийн замаа дөнгөж эхлээд байсан алс холын Монгол Улсын нийслэл Улаанбаатар хот руу явсан.

Улаанбаатарт тэрбээр шууд л хатуу ширүүн сорилтуудтай тулгарч эхэлсэн. Эрүүл ахуйн наад захын нөхцөл, мэргэшсэн эмч нар байгаагүйн уршгаар анхны хүүхдээ алдав. Магадгүй энэ шалтгаанаар тэрбээр өөрийн бүх амьдралаа Монголын ирээдүй хойч үеийг халамжлан хамгаалахад зориулж, Хүүхдийн санг үндэслэн байгуулав. Уг сан нь улсынхаа анагаах ухаан, боловсрол, соёл урлаг зэрэг нийгмийн бүх хөтөлбөрийн хөгжлийг хариуцав.

Орон даяар, засаг захиргааны хамгийн бага бүх нэгжид үлгэр жишээч хүүхдийн цэцэрлэг, сургууль, театр, номын сан, эмнэлэг баригдлаа. Зөвлөлтийн эмч, багш, инженерүүдийг урьж, Монгол Улсын бүх аймагт ажиллуулав. Ингэснээр үхлийн аюултай өвчнийг үндсээр нь устгаж, насжилтыг уртасгаж, хүүхдийн нас баралтыг бууруулсан. Монголд дэлхийн түвшний дуурь, балет, театрын урлагийг бий болгосон. Эдгээр нь өнөө ч үнэ цэнээ хадгалсаар байгаа ба Монголын соёл урлагийн ажилтнуудын эрэлт хэрэгцээ дэлхий дахинд байсаар байна.

Анастасия Ивановна бүхий л амьдралынхаа туршид эр нөхрийнхөө баруун гар, найдвартай түшиг тулгуур нь болж иржээ. Он жил улиран өнгөрөвч сайн сайхан үйл хэрэг хэзээ ч мартагддаггүй билээ. Залуу үе ч гэсэн Монгол Улсын “орос” ээжид хүндэтгэлтэй ханддаг. Түүний санаачилгаар Улаанбаатараас холгүйхэн байгуулагдсан Олон улсын хүүхдийн “Найрамдал” зуслангийн нутаг дэвсгэр дээр, дэлхий дахинд нэрээ цуурайтуулсан Мэргэжлийн сүмо бөхийн анхны Монгол их аварга Асашёорюү Дагвадоржийн санхүүгийн дэмжлэгтэйгээр Анастасия Ивановнагийн цээж баримлыг босгосон билээ” гэжээ.















Нийтэлсэн: Т.Болор-Эрдэнэ

Анастасия Цэдэнбал: Миний эмээ амьдралынхаа туршид өвөөгийн баруун гар, найдвартай түшиг тулгуур байсан  
Үзсэн: 78842 Mongolian National Broadcaster  

Анхааруулга:

Монгол Улсад коронавирус COVID-19 бүртгэгдсэнтэй холбогдуулан Монгол Улсын Засгийн газрын 2020 оны 03 дугаар сарын 10-ны өдрийн хуралдаанаас өгсөн чиглэлийг үндэслэн тус сайтын сэтгэгдэл бичих талбарыг түр хааж байгааг үүгээр мэдэгдэж байна.
MNB.mn сайтын редакц
Утас: 70127055

Бидэнтэй нэгдээрэй