Шууд Chart

Аймгийн заан Л.Отгонбаатар түрүүлж, цэргийн арслан цол хүртэв

2020-09-14 09:21:26

Цэргийн цол чимэг олгох "Бүх цэргийн наадам-2020" хүчит бөхийн барилдаан өчигдөр Монгол бөхийн өргөөнд боллоо.

Зэвсэгт Хүчний “Алдар” спорт хороо, ХХЕГ-ын “Хилчин” спорт хороо, ЦЕГ-ын “Хүч” спорт хороо, ОБЕГ-ын “Аврагч” спорт хороо, ШШГЕГ-ын “Сүлд” спорт хороо, ХСИС-ийн “Соёмбо” спорт хорооны нийт аймаг, цэргийн цолтой 256 бөх зодоглон барилдсанаас Архангай аймгийн Батцэнгэл сумын харьяат, ШШГЕГ-ын “Сүлд” спорт хороо, “Бөхбилэгт” дэвжээний бөх, аймгийн заан Л.Отгонбаатар түрүүлж, цэргийн арслан цол хүртсэн бол Төв аймгийн Баянчандмань сумын харьяат, ШШГЕГ-ын “Сүлд” спорт хоро, “Дүнжингарав” дэвжээний бөх, аймгийн хурц арслан Э.Ууганбаяр үзүүрлэв.

Жүдо бөхийн ДАШТ-ий хүрэл медальт, Азийн аварга, ОУХМ Л.Отгонбаатар тавын даваанд аймгийн арслан О.Наранбаатарыг, зургаагийн даваанд аймгийн арслан Б.Баянмөнхийг, долоогийн даваанд аймгийн заан М.Лхагвагэрэлийг, наймын даваанд аймгийн арслан Э.Ууганбаярыг тус тус даван түрүүллээ.

Их шөвөгт Хэнтий аймгийн Батширээт сумын харьяат, ХХЕГ-ын “Хилчин” спорт хороо, “Хан Хэнтийн аваргууд” дэвжээний бөх, аймгийн арслан Г.Бадрах, Завхан аймгийн Яруу сумын харьяат, ХХЕГ-ын “Хилчин” спорт хороо, Завхан дэвжээний бөх аймгийн заан М.Лхагвагэрэл нар шалгарлаа.

Харин Ховд аймгийн Буянт сумын харьяат, ХХЕГ-ын “Хилчин” спорт хороо, Ховд дэвжээний бөх, сумын заан Н.Амарсайхан, Увс аймгийн Ховд сумын харьяат, ШШГЕГ-ын “Сүлд” спорт хороо, “Увснуур” дэвжээний бөх, сумын заан Г.Эрдэнэтогтох нар тав даван шөвгөрч цэргийн начин цолд хүрэв.

Нийтэлсэн: У.Баярсайхан

Аймгийн заан Л.Отгонбаатар түрүүлж, цэргийн арслан цол хүртэв  
Үзсэн: 741 Mongolian National Broadcaster  

Анхааруулга:

Монгол Улсад коронавирус COVID-19 бүртгэгдсэнтэй холбогдуулан Монгол Улсын Засгийн газрын 2020 оны 03 дугаар сарын 10-ны өдрийн хуралдаанаас өгсөн чиглэлийг үндэслэн тус сайтын сэтгэгдэл бичих талбарыг түр хааж байгааг үүгээр мэдэгдэж байна.
MNB.mn сайтын редакц
Утас: 70127055

Бидэнтэй нэгдээрэй