Шууд Chart

Өвөлжилт хүндэрч болзошгүй аймгуудад хийсэн зудын эрсдэлийн үнэлгээний дүнг танилцууллаа

2020-10-20 17:46:19

ХХААХҮЯ-наас өвөлжилт хүндэрч болзошгүй 6 аймагт зудын эрсдэлийн үнэлгээ хийлгэх хүсэлт явуулсан юм. Энэ хүрээнд Улсын онцгой комиссын даргын тушаалаар Шуурхай бүлэг дээрх аймгуудад ажиллаж, үр дүнгээ нэгтгэн танилцуулсан. ХХААХҮ яаманд энэ ажлын хэсгийн мэдээлэл болон цаг үеийн бусад асуудлаар НҮБ-ын Хүнсний аюулгүй байдал, хөдөө аж ахуйн кластерын хурлыг зохион байгууллаа.

Хуралд кластерын гишүүн байгууллага болох Хүнс, хөдөө аж ахуй хөнгөн үйлдвэрийн яам, Онцгой байдлын ерөнхий газар, Ус, цаг уур орчны судалгаа, шинжилгээний хүрээлэн, НҮБ-ын Хүнс, хөдөө аж ахуйн байгууллага, Хүүхдийн сан, Хөгжлийн хөтөлбөр, Японы хүүхдийг ивээх сан, Монгол Улс дахь АНУ-ын Элчин сайдын яам, Монголын улаан загалмайн нийгэмлэг, “Мерси кор”, “Дэлхийн Зөн” зэрэг төрийн болон төрийн бус байгууллагын төлөөллүүд оролцлоо.

Улсын Онцгой комиссын даргын тушаалаар томилогдсон шуурхай бүлэг зуншлага муу, бэлчээрийн даац олон дахин хэтэрсэн аймгуудад гамшгийн эрсдэлийн үнэлгээг хийж, Баянхонгор аймаг “маш их”, Архангай, Говь-Алтай, Өвөрхангай, Дундговь, Өмнөговь аймгууд “их” эрсдэлтэй гарсан дүнг Засгийн газрын хуралдаанаар хэлэлцүүлэн өвөлжилтийн бэлтгэлийг эрчимжүүлэхэд зориулан хөрөнгө олгох шийдвэрийг гаргасан.

Хуралд оролцсон хүмүүнлэгийн байгууллагууд гамшгийн эрсдэлийг бууруулах чиглэлээр хийж буй ажил, хэрэгжүүлж буй төсөл, хөтөлбөрүүдээ танилцуулсны зэрэгцээ мэргэжлийн байгууллагуудын мэдээлэлд тулгуурлан гамшгийн эрсдэл өндөр аймгуудад үйл ажиллагаагаа идэвхжүүлэхээ илэрхийллээ.

Эх сурвалж: ХХААХҮЯ


Өвөлжилт хүндэрч болзошгүй аймгуудад хийсэн зудын эрсдэлийн үнэлгээний дүнг танилцууллаа   
Үзсэн: 200 Mongolian National Broadcaster  

Анхааруулга:

Та одоогоор сэтгэгдэл бичих боломжгүй байна!
MNB.mn сайтын редакц
Утас: 70127055

Бидэнтэй нэгдээрэй