Шууд Chart

Хэсгийн хороод цаг үеийн асуудлаар хуралдлаа

2020-12-01 17:38:58

Нийслэлийн ИТХ-ын хороодын өргөтгөсөн хурлыг цаг үеийн нөхцөл байдалтай холбоотойгоор цахимаар өнөөдөр хуралдууллаа.  Хурлаар, “Нийслэлийг 2021-2025 онд хөгжүүлэх таван жилийн үндсэн чиглэл” дунд хугацааны төлөвлөлтийн баримт бичгийн төслийн тухай, нийслэлийн Засаг дарга бөгөөд Улаанбаатар хотын Захирагчийн 2020-2024 оны үйл ажиллагааны хөтөлбөрийн төслийн тухай, Нийслэлийн 2021 оны төсөв батлах тухай, Нийслэлийн 2020 оны газар зохион байгуулалтын төлөвлөгөөний биелэлт, 2021 оны газар зохион байгуулалтын төлөвлөгөөний төслийн тухай, Нийслэлийн өмчөөс 2021 онд хувьчлагдах хуулийн этгээд, эд хөрөнгийн жагсаалт батлах тухай асуудлуудыг тус тус хэлэлцлээ.



Өргөтгөсөн хуралдааны үеэр төлөөлөгчид  “Нийслэлийг 2021-2025 онд хөгжүүлэх таван жилийн үндсэн чиглэл” дунд хугацааны төлөвлөлтийн баримт бичгийн төсөл, Нийслэлийн Засаг дарга бөгөөд Улаанбаатар хотын Захирагчийн 2020-2024 оны үйл ажиллагааны хөтөлбөр зэрэгт Улаанбаатар хотыг эдийн засгийн хувьд бие даасан статустай болгох, дагуул хотуудыг үе шаттай хөгжүүлэхээр тусгах, мөн боловсролын салбарт түлхүү хөрөнгө оруулалт хийх ёстой зэрэг санал хэлж байлаа. Тухайлбал, Хүний хөгжлийн хорооны дарга, төлөөлөгч П.Наранбаяр боловсролын салбарын хүртээмжийг нэмэх асуудлыг сайтар тусгаж өгсөн ч боловсон хүчин мэргэжилтнүүдийнхээ орлогыг дэмжих тал дээр нийслэл өөрөө бодлоготой байх ёстой гэх санал хэлсэн. Харин Зам тээвэр, хөдөлгөөн зохицуулалтын хорооны дарга, төлөөлөгч Б.Сэргэлэнбаатар гэр хорооллын дундах авто замыг шинэчлэн сайжруулж, шинээр ашиглалтад оруулан түгжрэлийг тодорхой хэмжээгээр бууруулах боломжтой гэсэн юм. Өөрөөр хэлбэл, төв замын ачааллыг бууруулж, туслах замуудыг сайжруулах нь зүйтэй гэж онцолсон.



Харин нийслэлийн 2021 оны төсөвт  Ковид-19 цар тахалтай холбоотойгоор нийгэм, эдийн засгийн хүндрэлийг даван туулахад шаардагдах хөрөнгийг тусад нь суулгаж өгөх ёстой. Аж ахуй нэгж, иргэдийг хямралаас гаргахын тулд тодорхой төлөвлөгөө гаргах ажиллах хэрэгтэй байна. Тухайлбал, Улаанбаатар хотын аялал жуулчлалаас олдог орлого 2020 онд зогссонтой холбоотойгоор Ковид-19 цар тахлын үед болон, дараа хэрэгжүүлэх аялал жуулчлалын төлөвлөгөө гаргах ёстой гэх саналыг төлөөлөгчид хороодын өргөтгөсөн хурлын үеэр хэлж байсан юм.
 
Эх сурвалж: Нийслэлийн ИТХ-ын ХМОНХТ

Хэсгийн хороод цаг үеийн асуудлаар хуралдлаа  
Үзсэн: 1091 Mongolian National Broadcaster  

Анхааруулга:

Монгол Улсад коронавирус COVID-19 бүртгэгдсэнтэй холбогдуулан Монгол Улсын Засгийн газрын 2020 оны 03 дугаар сарын 10-ны өдрийн хуралдаанаас өгсөн чиглэлийг үндэслэн тус сайтын сэтгэгдэл бичих талбарыг түр хааж байгааг үүгээр мэдэгдэж байна.
MNB.mn сайтын редакц
Утас: 70127055

Бидэнтэй нэгдээрэй