Шууд Chart

Европын орнуудад вакцинжуулалтын ажлыг хурдасгаж байна

2021-01-18 13:02:25

Европын улс орнуудад "Ковид 19"-ийн эсрэг хийж буй тэмцлээ үр дүнд  хүргэхийн тулд вакцинжуулалтад онцгой анхаарч байна. Гэхдээ зарим улс орнууд Норвегид  шинэ коронавирусний эсрэг вакцинаас болж 23 хүн нас барснаас болж Pfizer компанийн  вакцины  талаар  нэмэлт мэдээлэл  өгөхийг шаардаж байгаа аж.

Сербид Ерөнхийлөгч Вучич нисэх онгоцны  буудалд  очин Хятадын Sinofarm компанийн хөгжүүлсэн вакцины эхний ээлжийг хүлээн  авсан байна. Бээжин  Белградад  нийт 1 сая тун  вакцин илгээсэн  байна. Ингэснээр тус улс эрсдэлтэй бүлэгт хамаардаг 500  мянган  хүнийг вакцинжуулах боломж бүрдэж  байгаа юм. Испанид “Pfizer/Biotech” компанийн хөгжүүлсэн вакцины 2 дахь тунг өчигдрөөс хийж  эхэлсэн  байна. Тус улсын  эрүүл мэндийн яамны  мэдээгээр нийт 768 мянган  иргэн  вакцины эхний тунг хийлгэсэн  байна. Мөн тус улсад Moderna компанийн  вакциныг  хийж эхэлжээ. Эрх баригчид энэ зун гэхэд 47 сая хүн амынхаа 70 хувийг вакцинд хамруулна гэж тооцоолжээ.

Харин  Итали 1 сая гаруй хүнээ  вакцинд хамруулсан  Европын анхны  улс болоод  байна.  Өчигдрөөс Ром хотод  вакцины 2 дахь  тунг хийж эхэллээ. Гэхдээ тус улсын Ломбарди, Сицили, Больцано зэрэг  мужуудад хорио цээрийн дэглэмээ цуцлаагүй байгаагаас гадна  өөр 10 мужид  халдвар хамгааллын түвшинг ахиулж  шараас  улбар  шар  түвшинд шилжүүлжээ.

Тэгвэл Австри улсад ирэх 2 дугаар сарын 7-ныг хүртэл хөл хориог  сунгасан  байна. Хүн амынх нь дунд халдвар ихээр  тархсан хэвээр байгаа  учир  ийм арга хэмжээ авсны  Ерөнхий  сайд  Себастьян Курц зарлаж  иргэддээ  хандаж  тэвчээртэй  байхыг уриалжээ.

Швейцарьт шинэ коронавирусний халдварын тархалтаас сэргийлэхийн тулд 6 мянга гаруй шинэ цэргийг цахимаар  алба  хаалгахаар шийдвэрлэжээ.  Шинэ  цэргүүд  тусгай   аппликэйшний тусламжтайгаар 6 сарын  туршид өдөрт  6 цаг  гэртээ  дасгал сургууль хийх  юм байна.  Үүний  дараа  мөн  цахимаар  шалгалт өгч  ирэх 2 дугаар сарын  8-наас үндсэн  ангиуддаа  алба  хаах гэнэ.

Нийтэлсэн: Moнголын мэдээ

Европын орнуудад вакцинжуулалтын ажлыг хурдасгаж байна  
Үзсэн: 327 Mongolian National Broadcaster  

Анхааруулга:

Та одоогоор сэтгэгдэл үлдээх боломжгүй байна.
MNB.mn сайтын редакц
Утас: 70127055

Бидэнтэй нэгдээрэй