МҮОНТ-ээс бүтээж байгаа “Хэцүү анги” олон ангит киноны зураг авалтын нээлтийн ажиллагаа өнөөдөр боллоо. Тус арга хэмжээнд ОНРТ-ийн удирдлагууд, кино зохиолч болон киноны уран бүтээлчдийн баг, жүжигчин хүүхдүүд, зочид хэвлэл мэдээллийн төлөөгчид оролцлоо.
Уг киноны зохиолыг “Манай талынхан”, “Өөхөнд хулдсан егөө” шог хошин зохиол, “Цэцэгхэн нас” комикс ном, “Лайтай амьтан”, “Тарвага”, “Траншейны сонгууль” зэрэг телевизийн хошин зохиомж, “Цэцэгхэн нас”, “Төлөөс” зэрэг баримтат уран сайхны зохиомжуудыг бичсэн авъяаслаг сэтгүүлч, зохиолч, шог зураач А.Амарсайхан бичсэн байна. Зохиолч хэлэхдээ: “Олон ангит кино гэхээр амьдралаас хол хийсвэр дүрүүд байдаг. Би зохиолоо бичихдээ амьдралд тохиолддог бодит үйл явдлыг тусгаж нийгмийн бүх давхаргын хүрээний амьдралыг харуулахыг бодсон” гэлээ.
МҮОНРТ-ийн Ерөнхий захирал М.Наранбаатар “Хэцүү анги” олон ангит киноны уран бүтээлчдэд амжилт хүсээд, зураг авалт эхлэхийг зөвшөөрч хэлсэн үгэндээ “МҮОНРТ нь хувь хүний болон нийгмийн хөгжлийг дэмжих, ялангуяа хүүхэд залуучуудын оюуны болон бие бялдрын хөгжилд онцгой анхаарах үүргийг хуулиар хүлээсэн байгууллага билээ. Энэ утгаараа бид сургуулийн ахлах ангийн сурагчдын үерхэл нөхөрлөл, үзэл бодлын зөрчил, сургууль, эцэг эх, багш нарын амьдралын харилцааны нарийн эмзэг асуудлуудыг дэлгэн үзүүлсэн “Хэцүү анги” олон ангит киног
бүтээхээр болж, киноны зураг авалтын нээлтэнд та бид ирээд байна. Энэ кинонд МҮОНТ-ийн шилдэг зураглаачид, уран бүтээлчдийн баг, авъяаслаг хүүхдүүд ажиллах тул бүтээл маань олны сонирхолыг татсан, чанартай сайн болно гэдэгт итгэлтэй байна” гэсэн юм.
60 ангитай киноны зураг авалт зуны турш үргэлжилж, МҮОНТ-ийн ойн өдөр буюу 2009 оны 09-р сарын 27-ны өдрөөс эфирт гаргахаар төлөвлөн ажиллаж байна.
МҮОНРТ-ийн Олон нийтийн мэдээлэл судалгааны төв