Шууд Chart

Усчин аврагчдыг бэлтгэх дадлага сургалт боллоо

2021-09-28 09:04:10

Монгол Улсын Засгийн газрын 2020-2024 оны үйл ажиллагааны хөтөлбөрт Хөвсгөл нуурын экосистемийн бохирдлын эрсдэлийн судалгаа хийж, нуурт живсэн машин, техникийг татан гаргах ажлыг олон улсын байгууллагатай хамтран зохион байгуулахаар тусгасан.

Энэхүү ажлын хүрээнд Онцгой байдлын ерөнхий газар, ОХУ-ын Онцгой байдлын яам, Байгалийн эрэн хайх, аврах отрядтай хамтарч Хөвсгөл нуурт живсэн “Сүхбаатар” усан онгоц болон бусад машин, техникийг илрүүлэх, байрлалын зураглал гаргах, судалгаа хийх, усчин аврагчдыг бэлтгэх дадлага сургалт 2021 оны 09 дүгээр сарын 20-27-нд Хөвсгөл аймгийн Хатгал тосгонд явагдлаа.

Судалгааны ажилд ОХУ-ын Онцгой байдлын яам болон Байгалийн эрэн хайх, аврах отрядаас 9 хүний бүрэлдэхүүнтэй баг, 300 метр хүртэлх гүнтэй усанд эрэн хайх ажиллагаа явуулах хүчин чадалтай эхолот болон усны дрон зэрэг тусгай зориулалтын багаж, тоног төхөөрөмжтэйгээр оролцов.

Түүнчлэн Монгол Улс Хөвсгөл нуур живсэн машин техникийг гаргах ажлыг бие даан гүйцэтгэх зорилгоор онцгой байдлын албан хаагчдад зориулсан гүний шумбалтын онолын болон дадлагын сургалтыг ОХУ-ын мэргэжилтэн, багш нарын тусламжтайгаар явууллаа.

Зам, тээврийн хөгжлийн яамны харьяа Далайн захиргаа дээрх хамтарсан дадлага сургалт, судалгаа, Хөвсгөл нуурт живсэн машин техникийг татан гаргах ажилд ХБНГУ-д үйлдвэрлэсэн далайд аврах ажиллагаа явуулах зориулалттай 8,3 метрийн урт, тусгай тоноглол бүхий завь, техникийн дэмжлэг үзүүлж холбогдох мэргэжилтэн, улсын байцаагчдыг оролцуулж, хамтран ажиллав гэж Зам, тээврийн хөгжлийн яамны харьяа Далайн захиргаанаас мэдээллээ.


Усчин аврагчдыг бэлтгэх дадлага сургалт боллоо  
Үзсэн: 360 Mongolian National Broadcaster  

Сэтгэгдэл бичих:

АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.
1000 Сэтгэгдэлээ бичнэ үү

Бидэнтэй нэгдээрэй