Оюутны эрүүл мэндийг дэмжих сарын аяны хүрээнд МУИС-ийн оюутнуудад зориулсан өдөрлөг боллоо

“Эерэг хандлага–Эрүүл оюутан” уриатайгаар оюутны эрүүл мэндийг дэмжих сарын аяныг зохион байгуулж байна.

Тэгвэл энэ хүрээнд өчигдөр буюу 2022 оны 11 дүгээр сарын 1-ний өдөр нийслэлд хамгийн их буюу 20 гаруй мянган оюутантай Монгол Улсын Их Сургуульд өдөрлөг зохион байгууллаа.

Өдөрлөгөөр оюутан залууст төрөөс залуучуудын хөгжлийг дэмжих бодлого үйл ажиллагааг таниулах, нөхөн үржихүйн эрүүл мэндийн боловсрол олгох, ЭМД-ын ач холбогдлыг ойлгуулан газар дээр нь ЭМД-ын шимтгэлээ хурдан шуурхай төлөх боломж бүрдэх, сайн дурын ажлын ач холбогдлыг таниулсан юм.



Тус өдөрлөгт Эрүүл мэндийн яам, Эрүүл мэндийн даатгалын ерөнхий газар, Нийгмийн эрүүл мэндийн үндэсний төв, Боловсролын ерөнхий газрын дарга, Гэр бүл, хүүхэд залуучуудын хөгжлийн газар, Монголын оюутны холбооноос мэдээлэл танилцуулан оролцож, оюутан суралцагчдыг урьдчилан сэргийлэх, эрт илрүүлэх үзлэг, шинжилгээ, оношилгоонд хамрагдахын ач холбогдлыг таниулав.

“Эерэг хандлага – Эрүүл оюутан” уриан дор 2022 оны 10 дугаар сараас 12 дугаар сар хүртэл явагдах оюутны эрүүл мэндийг дэмжих сарын үйл ажиллагаанд ирээдүйнхээ хөгжил дэвшлийн төлөө зүтгэж буй Монголын мянга, мянган оюутан, залуучуудыгаа өөрийн үнэт зүйл болох эрүүл мэндийнхээ төлөө тус үйл ажиллагаанд идэвхтэй оролцохыг уриаллаа.