Ахмад А.Отгонбаяр пауэрлифтингийн Азийн аварга боллоо

Энэтхэг улсын Удайпур хотноо энэ сарын 1-ээс 6-ны өдрүүдэд зохион байгуулагдсан Азийн аварга шалгаруулах пауэрлифтингийн тэмцээнд Орхон аймгийн Онцгой байдлын газрын Гал түймэр унтраах, аврах 58 дугаар ангийн захирагч, ахмад А.Отгонбаяр Монгол Улсаа төлөөлөн оролцож, Азийн аварга боллоо.

Тэрээр М1 ангиллын -120 кг-ийн жингийн гурван төрөлд нийт 740 кг жин өргөж, аваргын алтан медалийн эзэн болсон бол энэ жингийн мөнгөн медалийг Казахстаны тамирчин, хүрэл медалийг Ираны тамирчин тус тус хүртжээ.

Ахмад А.Отгонбаяр нь тэмцээний таталтын болон шахалтын төрөлд тус бүр 230 кг жин өргөж алтан медаль, суултын төрөлд 280 кг жин өргөж, алтан медаль хүртэн, пауэрлифтингийн М1 ангиллын -120 кг жингийн аварга болсон юм гэж Онцгой байдлын ерөнхий газраас мэдээллээ.