Элчин сайд Л.Баттулга Итгэмжлэх жуух бичгээ барив

Монгол Улсаас Туркменистан Улсад суух Онц бөгөөд Бүрэн эрхт Элчин сайд Л.Баттулга өчигдөр Туркменистаны Үндэсний Хурлын дарга, хатагтай Гульшат Сахыевна Маммедовад Итгэмжлэх жуух бичгээ барив.

Уулзалтын үеэр Элчин сайд Монгол Улсын Ерөнхийлөгч Х.Баттулгын мэндчилгээг Туркменистаны Ерөнхийлөгч Гурбангулы Бердымухамедовт дамжуулахыг хүсч Монгол Улсын Их Хурлын дарга М.Энхболдын мэндчилгээг түүнд уламжлав. Уулзалтаар улс орныхоо улс төр, нийгэм эдийн засгийн байдал болон гадаад бодлогын үйл ажиллагааны талаар мэдээлэл солилцож хоёр улсын харилцаа, хамтын ажиллагааг хөгжүүлэх талаар санал солилцов.

Энэ үеэр Туркменистаны Ерөнхийлөгч Гурбангулы Бердымухамедовоос Элчин сайдад албан тушаалдаа орж байгаатай нь холбогдуулан илгээсэн захидлыг Г.С.Маммедова гардуулав. Элчин сайд Л.Баттулга хоёр улсын найрсаг харилцаа, бүх талын хамтын ажиллагааг цаашид хөгжүүлэхэд идэвхитэй ажиллахаа илэрхийлэв.