Евро-Стандарт нэвтрүүлэх чиглэлээр хамтарч ажиллана

Барилга , хот байгуулалтын сайд Д.Цогтбаатар өнөөдөр ХБНГУ-аас Монгол Улсад суугаа Онц бөгөөд Бүрэн эрхт Элчин сайд ноён Герхард Тийдеманнийг хүлээн авч уулзан хоёр талын харилцаа, хамтын ажиллагааны талаар санал солилцохын зэрэгцээ цаашид хэрэгжүүлэх үйл ажиллагааны талаар ярилцав.

Уулзалтын үеэр сайд Д.Цогтбаатар евро стандартыг нутагшуулах асуудлаар дунд хугацааны төсөл хэрэгжүүлэх, барилгын стандарт, норм нормативын чиглээр сургалт зохион байгуулах, үл хөдлөх хөрөнгийн зах зээлд хамтран ажиллах саналыг тус тус дэвшүүллээ. Элчин сайд Герхард Тийдеманн хоёр талын харилцаа тогтвортой хөгжиж байгаад сэтгэл хангалуун байгаагаа хэлээд сайдын тавьсан хүсэлтийг судалж, хэрэгжүүлэх талаар санал бодлоо хэлж, туслаж дэмжихээ илэрхийлэв. Мөн эрчим хүчний хэмнэлттэй гэрэлтүүлгийн технологийг Монголд нэвтрүүлэх чиглэлээр хамтран ажиллах санал дэвшүүлсэн юм.