ХХААХҮЯ-ны удирдлагууд орон нутагт ажиллалаа

Засгийн газрын 2018 оны 4 дүгээр сарын 27-ны өдрийн хуралдаанаар “Малын өвчнөөс урьдчилан сэргийлэх, малын үржүүлэг, селекцийн ажил, үйлчилгээ”-г жил бүрийн 5 дугаар сарын 1-ний өдрөөс 10 дугаар сарын 20-ны өдөр хүртэл явуулахаар шийдвэрлэсэн. Тиймээс мал эмнэлгийн урьдчилан сэргийлэх болон мал үржүүлэг технологийн ажил, үйлчилгээний жилийн ажил өчигдөр улс орон даяар эхэллээ.

Үүнтэй холбогдуулан ХХААХҮ-ийн дэд сайд Ж.Сауле Дорнод аймагт ажилласан бол Төрийн нарийн бичгийн дарга Д.Энхбат болон холбогдох албаны хүмүүс Дундговь аймагт ажиллалаа. Тэд аймгуудын Хүнс, хөдөө аж ахуйн газрынханд цаг үеийн асуудлаар үүрэг чиглэл өгч, санал хүсэлтийг сонссон. Мөн мал эмнэлгийн ажил үйлчилгээний хувийн нэгжүүдэд вакцин, био бэлдмэлийн дээж гардуулж, малчны хотонд очин, мал эмнэлгийн урьдчилан сэргийлэх арга хэмжээг хэрэгжүүлж байгаатай газар дээр нь танилцсан юм.

Засгийн газар мал аж ахуйн салбарын тогтвортой хөгжлийг хангах, хүн ардаа баталгаатай, чанартай хүнсээр хангаж, хөдөө аж ахуйн бүтээгдэхүүний экспортыг нэмэгдүүлэн, хүнс экспортлогч улс болох зорилт тавьсан. Энэ зорилтыг хангахад мал сүргээ болзошгүй өвчнөөс урьдчилан сэргийлэх, эрүүлжүүлэх, мал үржүүлэг, технологийн ажлыг орон даяар зохион байгуулж, бүх нийтийг хамруулж байна.

Малчдад мал сүргээ ямар нэгэн өвчний эрсдэлгүй өсгөн үржүүлж, ашиг шимийг нь хүртэхэд дэмжлэг үзүүлэх, тэдний ая тухтай амьдрах боломжийг бүрдүүлэхэд чиглэсэн уг арга хэмжээнд аймаг, орон нутгийн төр захиргааны болон мэргэжлийн байгууллагууд, малчид идэвх санаачилгатай оролцож, хариуцлагатай ажиллахыг ХХААХҮЯ-наас уриалж байна.

ХХААХҮ-ийн дэд сайд Ж.Сауле мал эмнэлгийн урьдчилан сэргийлэх болон мал үржүүлэг технологийн ажил, үйлчилгээний жилийн ажлын нээлтийн үеэр /Дорнод аймаг, 2018.05.01/

ХХААХҮЯ-ны Төрийн нарийн бичгийн дарга Д.Энхбат мал эмнэлгийн урьдчилан сэргийлэх болон мал үржүүлэг технологийн ажил, үйлчилгээний жилийн ажлын нээлтийн үеэр, /Дундговь аймаг, 2018.05.01/