Хүрэх мэдрэхүйтэй хиймэл гар бүтээжээ

АНУ-ын Охио муж улсад байрладаг Кейс Вестерн Резерв судалгааны их сургуульд хүрэх мэдрэхүй бүхий хиймэл гар бүтээх төсөл хэрэгжүүлж байна. АНУ-ын Батлан хамгаалах яамны харьяа Батлан хамгаалах дэвшилтэт судалгааны агентлаг энэ төслийг санхүүжүүлж буй юм байна.

Энэ агентлаг Кейс Вестерн Резерв их сургуулийн мэдрэх чадвартай хиймэл гар бүтээх төсөлд 4.4 сая америк долларын санхүүжилт олгожээ. Тус хөрөнгийг ашиглан төслийн багийнхан хиймэл гарыг жинхэнэ мэт үйлдэл, мэдрэхүйтэй болгохоор зорьж ажиллаж байгаа юм.

Хиймэл гаранд суурилуулсан тусгай мэдрэгч нь тус гар бусад биетэд хүрэх, даралт учруулах хэмжээг тодорхойлж, үүнийгээ мэдрэлийн дохионд хувиргадаг байна. Энэ дохиог хүний мэдрэлийн зангилаанд холбосноор хүн хиймэл гараар хүрсэн биетээ мэдрэх боломж нээгдэж байгаа юм. Төслөөс бүтээсэн хиймэл гарны анхны загварыг Игорь Спетик гэх 49 настай эрэгтэйд суулган, туршиж эхэлжээ.