Монгол, Хятадын уран бүтээлчид үзэсгэлэн гаргалаа

Монгол Улс, БНХАУ хоёр орны хооронд найрсаг харилцаа тогтоосны 65 жилийн ойг тохиолдуулан Өвөрмонголын “Их зуу” орчин үеийн урлагийн төв, Монголын Урчуудын эвлэлийн хороо хамтран зохион байгуулж буй “Монгол морь” үзэсгэлэнгийн нээлт өчигдөр МУЭ-ийн үзэсгэлэнгийн танхимд боллоо.

Тус үзэсгэлэн нь монгол морьдыг уран сайхны хэлбэрээр илэрхийлэхээс гадна хоёр орны найрамдалт харилцааг нийтэд таниулах зорилготой юм.

Үзэсгэлэнд хоёр орны 20 орчим зураачийн бүтээлийг дэлгэжээ. Энэхүү үзэсгэлэнгийн бүтээлүүдээс нүүдэлчдийн ахуй, ёс заншил, онгон байгаль болон Монгол хүн морь, адуугаа эрдэнэ мэт дээдэлдгийг харах боломжтой юм.