Н.Айшолпан: Би Монгол оронд төрж өссөндөө цаг үргэлж бахархаж явдаг

Бүргэдчин охин Н.Айшолпантай холбоотой ташаа мэдээлэл цахим орчинд тарсан. Тэрбээр энэ талаар өөрийн цахим хуудаснаа “Сайн байцгаана уу миний Монголын ард түмээн. Хэд хоногийн өмнө миний бие Казахстан улсын Ерөнхийлөгч Нурсултан Назарбаевын залуучуудтай хийсэн уулзалтын үеэр Казахстан улсыг атамекен буюу миний өвөг дээдсийн төрсөн нутаг гэж хэлсэн үгийг минь гуйвуулж, Казахстан миний эх орон гэж хэлсэн мэтээр бусдад ташаа мэдээлэл түгээжээ. Миний эх орон Монгол. Би Монголд төрж өссөн казах охин. Би энэ сайхан оронд төрж, өссөндөө цаг үргэлж бахархаж явдаг гэдгийг та бүхэндээ хэлмээр байна. Буруу ташаа мэдээлэл тараасан нэр бүхий сонин болон сайтын хамт олонд нийтлэлдээ залруулга хийхийг хүсэж байна” гэжээ.

Дашрамд өгүүлэхэд, Н.Айшолпаны амьдралаас сэдэвлэн гадны киночдын хийсэн "The Eagle huntress" бүтээл 89 дэх удаагийн “Оскар”-ын наадамд нэр дэвшиж, "Шилдэг баримтат кино" төрөлд өрсөлдөх богино жагсаалтад багтсан юм. Тэрбээр мөн “Asia Game Changer Awards-2017” шагналыг Монголоос анх удаа хүртсэн бөгөөд 2019 он гарахын өмнө Ерөнхийлөгч Х.Баттулга салбартаа олон жил идэвх зүтгэлтэй ажилласан, өндөр амжилт гаргасан эрхмүүдэд төрийн одон, медаль гардуулахдаа бүргэдчин охин Н.Айшолпаныг Алтангадас одонгоор шагнасан.

Мөн Н.Айшолпан өнгөрсөн онд өөрийн нэрэмжит сан байгуулж, гүйцэтгэх захирлаар нь ажиллаж байгаа юм.