Сэтгүүлч Ц.Ганболдод "Соёлын гавьяат зүтгэлтэн" цол хүртээв

Эрх чөлөө, тусгаар тогтнолоо сэргээн мандуулсан өдөр буюу өнгөрөгч оны 12-р сарын 29-нд Монгол Улсаас ОХУ-д суугаа Элчин сайдын яамны зөвлөх, сэтгүүлч Цогсүрэнгийн Ганболдод Монгол Улсын Ерөнхийлөгчийн зарлигаар "Соёлын гавьяат зүтгэлтэн" цол хүртээжээ.

Ц.Ганболд ОХУ-ын Санкт-Петербургийн Улсын их сургуулийг сэтгүүлч мэргэжлээр төгссөн бөгөөд Монгол Улсын Ерөнхий сайдын Хэвлэлийн төлөөлөгчөөр хоёр удаа, Засгийн газрын төв хэвлэл "Засгийн газрын мэдээ" сонины ерөнхий эрхлэгч, МҮОНТ-ийн "Монголын мэдээ" агентлагийн захирал, Телевизийн "Форум" ток шоу нэвтрүүлгийн ерөнхий редактораар ажиллаж байсан манай хэвлэл мэдээллийн салбарын хүлээн зөвшөөрөгдсөн төлөөлөгчдийн нэг юм.

Тэрбээр М.Энхсайханы тэргүүлсэн Засгийн газрын тухай "Хөшүүн царцанги нийгэмд "дайн" зарласан шинэчлэгчид", өөрийн тухай "Цогсүрэнгийн Ганболд: Миний их улс төр" нэртэй номууд туурвиж, телевизийн бүрэн хэмжээний "Догшин хар сүлдний нууц" баримтат киноны ерөнхий продюссерээр ажиллажээ.

Эх сурвалж: Монгол Улсаас Оросын Холбооны Улсад суугаа Элчин сайдын яам