Шилдэг бүтээл шалгаруулах улсын 8 дугаар уралдаан Орхон аймагт эхэллээ

Боловсрол, соёл шинжлэх ухааны яам, Монголын урлагийн ажилтны холбоо, Театрын музей хамтран зохион байгуулж буй театруудын “Шилдэг бүтээл-2018” улсын VIII уралдаан орон даяар бүсчилсэн хэлбэрээр 10 дугаар сарын 10-аас 11 дүгээр сарын 10-ны хооронд зохион байгуулагдаж байна.

Баруун бүсийн аймгуудын уралдаан Завхан аймгийн Улиастай хотод, зүүн бүсийн аймгуудын бүтээлийн уралдаан Дорноговь аймгийн Сайншанд хотод зохион байгуулагдаж байгаа бол төвийн бүсийн Архангай, Булган, Дархан, Хөвсгөл, Төв, Өвөрхангай зэрэг театруудын уралдаан манай аймагт зохион байгуулагдахаар өчигдөр “Амар”-ын талбайд нээлтээ хийлээ. Энэ удаагийн театруудын шилдэг бүтээл шалгаруулах уралдаан Монгол улсын Ардын жүжигчин, төрийн шагналт, эрдэмтэн зохиолч, найруулагч Э.Оюуны мэндэлсний 100 ойтой давхцаж байгаагаараа онцлог юм.

Амарын талбайд болсон нээлтийн үйл ажиллагаанд Монголын урлагийн ажилтны холбооны Ерөнхийлөгч Б.Тунгалаг, БСШУС-ын яамны Соёл, урлагийн салбарын хөгжлийн бодлого, төлөвлөлт хариуцсан мэргэжилтэн З.Баянзул, Орхон аймгийн Засаг даргын орлогч А.Түвшинжаргал, аймгийн БСУГ-ын дарга Ж.Бат-Амгалан, Баян-Өндөр сумын Засаг дарга С.Ганцогт болон төвийн бүсийн аймгуудын театрын дарга нар оролцлоо. Манай аймгийн Хүүхэд залуучуудын театр “Шилдэг бүтээл-2018” улсын VIII уралдаанд Ф.Шиллерийн зохиол “Хар санаа хайр сэтгэл” сонгодог жүжгээр оролцож байна.