Шороон шуурганы улмаас Даланжаргалан, Айраг сумын нутагт үзэгдэх орчин хязгаарлагджээ
Энэ долоо хоногт Дорноговь аймгийн нийт нутгаар салхи секундэд 14-16 метр, зарим үед секундэд 18 метр хүрч нийт нутгаар шороон шуурга шуурна.
Мэдээллийн алба
Дорноговь аймгийн Сайншанд суманд одоогийн байдлаар агаарын температур +19 градус, салхи секундэд 16-17 метр хүрч байна.
Даланжаргалан, Айраг сумын нутагт үзэгдэх орчин хязгаарлагдаж зам тээврийн хөдөлгөөнд оролцоход хүндрэл учраад байгаа хэдий ч замын хөдөлгөөнийг одоогийн байдлаар албан ёсоор хязгаарлаагүй талаар Дорноговь аймгийн замын цагдаагийн хэлтсээс хэлж байна.
Энэ долоо хоногт Дорноговь аймгийн нийт нутгаар салхи секундэд 14-16 метр, зарим үед секундэд 18 метр хүрч нийт нутгаар шороон шуурга шуурна.
Агаарын температур ихэнх нутгаар 14-19 градус дулаан, нутгийн өмнөд хэсгээр 20-22 градус дулаан байна.
Энэ сарын 30-нд нутгийн өмнөд хэсгээр, ирэх дөрөвдүгээр сарын 1-нд нутгийн хойд хэсгээр бага зэргийн хур тунадас орно.
Өнөөдрөөс 31ны хооронд салхи секундэд 14-16 метр, ирэх дөрөвдүгээр сарын 1-нд зарим үед секундэд 18-20 метр хүрч цасан болон шороон шуурга шуурна гэсэн мэдээллийг Дорноговь аймгийн Ус цаг уур орчны шинжилгээний алба мэдээлж байна.
