Сүхбаатар аймгийн Онцгой байдлын газрын албан хаагчид 132 хүний амь насыг авран хамгаалжээ

ОБЕГ-ын дарга, бригадын генерал Т.Бадрал Сүхбаатар аймагт ажиллах үеэр Онцгой байдлын газрын албан хаагчидтай уулзаж, санал бодлоо хуваалцан тэдний сонирхсон асуултад хариуллаа.

Албан хаагчид, түймрийн голомтод ажиллаж байгаа албан хаагчдын гутлын чанар муу байгааг генералдаа дуулгалаа. Мөн хорт хийнээс хамгаалах баг, компьютер, гамшгийн голомтод ашиглах иридиум утас, газрын зурагны хангалт дутагдалтай байгааг албан хаагчид хэлж байсан юм.

Мөн гамшгийн голомтод ажилласан албан хаагчид нөхөн сэргээх эмчилгээнд хамрагдах хүсэлтэй байгаагаа илэрхийлж байлаа. Тухайлбал, 2004 онд тус газрын 4 албан хаагч шүлхий өвчний голомтод ажиллаж байгаад нэр нь үл мэдэгдэх, хаанаас, хэн нийлүүлсэн нь мэдэгдэхгүй химийн бодисонд хордсон байна. Улмаар албан хаагчдын элэгний үйл ажиллагаанд өөрчлөлт орж, байнгын эмчилгээ хийлгэдэг болжээ. Уг химийн бодис нь промолин хэмээх ариутгалын бодисоос 20 дахин хортой химийн хорт бодис байсан нь шинжилгээгээр батлагджээ.

Бригадын генерал Т.Бадрал, дээрхи албан хаагчдыг ОБЕГ-ын дэргэдэх Жаргалант дах Давтан сургалт, сэргээн заслын төвд эмчлүүлэн сувилуулах, эмчийн хяналтад байхыг зөвлөлөө.

Эх сурвалж: ОБЕГ