Сургууль, цэцэрлэгийн орчинд хүүхдийн аюулгүйн зураглал гарган ажиллахыг үүрэг болгов

Ховд аймгийн удирдлагууд хүүхдийн эрх, аюулгүй байдлыг хангах чиглэлээр байгууллагын үүрэг оролцоог нэмэгдүүлэх, боловсролын салбар дахь хүүхэд хамгаалал, эрүүл мэндийн үйлчилгээн дэх хүүхэд хамгааллын үйл ажиллагааг сайжруулах, үр нөлөөг нэмэгдүүлэх, тулгамдаж буй асуудлуудыг шийдвэрлэх, хүүхдийн эсрэг хүчирхийлэл, гэмт хэргээс урьдчилан сэргийлэх зорилгоор ерөнхий боловсролын сургууль, цэцэрлэгийн захирал, эрхлэгч нартай уулзалт хийж, үүрэг чиглэл өгөв.

Уулзалтын хүрээнд орон нутаг дахь хүүхэд хамгааллын өнөөгийн байдал, эрсдэлээс урьдчилан сэргийлэх арга хэмжээ, хүүхдийн эрүүл мэнд, аюулгүй байдлыг хангах талаар холбогдох мэргэжилтнүүд мэдээлэл хийж, цаашид анхаарах асуудлуудын талаар санал солилцлоо. Энэ үеэр сургууль, цэцэрлэгийн орчинд хүүхдийн аюулгүйн зураглал гарган ажиллахыг үүрэг болгосон бөгөөд замын тэмдэг тэмдэглэгээ, хурд сааруулагч хийх, хүүхдийн өмнө үүрэг хүлээгч бусад байгууллагуудтай хамтын ажиллагаагаа сайжруулах, сургууль, цэцэрлэгийн орчин дахь эрүүл, аюулгүй байдлыг хангах үүднээс байгууллагын 50 метр орчимд байнгын цэвэрлэгээ хийх, зарим цэцэрлэгүүд авто машины зогсоол бий болгох шаардлагатай байгааг оролцогчид онцлон хэллээ.