Улсын Их Хурлын Тамгын газрын удирдлага эмэгтэйчүүддээ хүндэтгэл үзүүлэв

Олон улсын эмэгтэйчүүдийн эрхийг хамгаалах өдрийг тохиолдуулан Улсын Их Хурлын Тамгын газрын удирдлага өнөөдөр /2018.03.07/ УИХ-ын Тамгын газрын ажилтнууд болон тус газарт ажиллаж байгаад гавьяаны амралтад гарсан эмэгтэйчүүдэд баяр хүргэж, хүндэтгэл үзүүллээ.

Жил бүр уламжлал болгон зохион байгуулдаг уг арга хэмжээг УИХ-ын Тамгын газрын Ерөнхий нарийн бичгийн дарга Ц.Цолмон нээж хэлсэн үгэндээ, Олон улсын эмэгтэйчүүдийн эрхийг хамгаалах өдрийг дэлхийн олон оронд 110 дахь жилдээ өргөн дэлгэр, хүндэтгэлтэйгээр тэмдэглэж байна. Айл гэр өнгөтэй гэрэлтэй, сайн сайхан байх нь эмэгтэйчүүдээс хамаардагтай нэгэн адил байгууллагын дотор ч та бүгдийн маань үүрэг, оролцоо өндөр байдаг билээ гээд ажлын амжилт, эрүүл энх, аз жаргалыг хүсэн ерөөлөө.