Архангай аймгийн Булган сумын Тусгалт багийн нутагт гарсан түймрийг унтраах ажил явагдаж байна

Нийт нутгаар хуурайшилт ихтэй энэ цаг үед Архангай аймгийн Булган сумын Тусгалт баг, Улиатай гэдэг газарт 2020 оны дөрөвдүгээр сарын 28-нд гарсан ой хээрийн түймрийг унтраах ажиллагаа явагдаж байна. Тус ажиллагаанд Архангай аймгийн Онцгой байдлын 38 алба хаагч, ОБЕГ-ын Үндэсний аврах бригадын 25 алба хаагч, Өвөрхангай аймгийн Хархорин сумын Онцгой байдлын хэлтсийн 9 алба хаагч, орон нутгаас 141 хүн оролцож байгаа юм.

Хэдийгээр онцгой байдлын алба хаагчид иргэд нийтдээ 30 гаруй гал унтраах автомашин техник хэрэгсэлтэйгээр ажилласан ч нөхцөл байдал хүнд байгаа юм. Аймгийн онцгой байдал болон орон нутгийн иргэд хүчээ нэгтгэн ажилласаар байгаа энэ хүнд нөхцөлд Архангай аймгаас сонгогдсон УИХ-ын гишүүн, Архангай аймгийн нутгийн зөвлөлийн дарга Ж.Мөнхбат, УИХ-ын гишүүн, БСШУС-ын сайд Ё.Баатарбилэг, УИХ-ын гишүүн Г.Тэмүүлэн нар нөхцөл байдалтай танилцан газар дээр нь ажиллаж шаардлагатай байсан 25 сая төгрөгийн санхүүжилтийг аймаг орон нутгийн удирдлагуудтай зөвлөлдөж төсвөөс яаралтай санхүүжүүлэхээр шийдвэрлэлээ.

Уг асуудлыг шийдвэрлэснээр хээрийн нөхцөлд ажиллах орон байр, багаж хэрэгсэл төдийгүй хоол хүнсээр хангагдаж байгаа юм. Нутгийн иргэд Суварга хайрхан уулсын хойд салбар ууланд гарсан ой хээрийн түймэрт өөрсдийн хувийн унаа техник, машин мотоциклийг эвдрэхийг үл хайхран сайн дураараа үйлчилж, хөрөнгө мөнгөө заран хоёргүй сэтгэлээр ажиллаж байгаа нь өөрийн эрхгүй бахархал төрүүлж байлаа. Аймгийн удирдлагуудын зүгээс цаг алдалгүй бүхий л боломж бололцоог бүрдүүлэн шаардлагатай арга хэмжээг авч ажиллаж байна. Түймрийн шалтгааныг тогтоохоор аймгийн цагдаагийн газрын бие бүрэлдэхүүн ажиллаж байна.

Мөн Архангай аймгийн Булган сумын төвд насанд хүрсэн нэг ч эрэгтэй хүн үлдээгүй бөгөөд тэд бүгд түймэр унтраах үйл ажиллагаанд сайн дураараа маш идэвхтэй оролцон ажиллаж байгаа бол цахим орчинд Архангай аймгийн Булган сумын эхчүүд, эмэгтэйчүд “Ээжүүдийн групп”-ийг шинээр байгуулж түймэр унтраахаар явсан эрчүүдийнхээ хоол хүнс шаардлагатай зүйлүүдийг, сургууль, цэцэрлэгийн багш нар, эмнэлгийн ажилтнууд хүчээ нэгтгэн хоол хүнс, хувцас хэрэглэл, бээлий зэргийг бэлтгэн хээрийн штабад өөөрсдийн идэвх санаачилга итгэл сэтгэлээр гар нийлэн хамтран ажиллаж нутаг усаа гал түймрийн аюулаас хамгаалан зүтгэж буйд нутгийн удирлагууд талархан бахархаж байна.

Хүнд үед ажиллаж байгаа онцгой байдлын алба хаагчдын үйл ажиллагааны санхүүжилтийг улсын онцгой комисс, Монгол Улсын шадар сайд Ө.Энхтүвшинд хүргүүлж шийдвэрлүүлэхээр боллоо. Эх нутгаа ой, хээрийн түймрээс хамгаалах үйлсэд хоёргүй сэтгэлээр зүтгэж буй нутгийн иргэд, түймэрт ажиллаж эвдэрсэн хувийн машин, мотоциклоо засварлахад дэмжлэг үзүүлэхийг УИХ-ын гурван гишүүнээс хүссэн бөгөөд энэ асуудлыг холбогдох байгууллагад уламжилж өгнө гэдгээ Архангай аймгаас сонгогдон ажиллаж байгаа УИХ-ын гишүүн Ж.Мөнхбат, УИХ-ын гишүүн, БСШУС-ын сайд Ё.Баатарбилэг, УИХ-ын гишүүн Г.Тэмүүлэн нар илэрхийллээ.