Баянзүрх дүүрэг “Улаанбаатар Марафон -2017” цом аялуулж байна

Нийслэлийн Засаг даргын А/147-р захирамжаар жил бүрийн тавдугаар сарын гурав дахь долоо хоногийн бямба гарагийг бүх нийтээр биеийн тамир, спортыг дэмжих авто машингүй өдөр болгож, "Улаанбаатар марафон" олон улсын гүйлтийг зохион байгуулж байхаар шийдвэрлэсэн.

Энэхүү “Улаанбаатар Марафон-2017” тэмцээний цомыг Баянзүрх дүүргийн ИТХ, Засаг даргын Тамгын газар хүлээн авч харьяа байгууллагууд, аж ахуйн нэгж, ерөнхий боловсролын сургууль, мэргэжлийн сургалт үйлдвэрлэлийн төв, их дээд сургууль, аж ахуй нэгж байгууллага, иргэдийн дунд аялуулах ажлыг зохион байгуулж байна.

Аяны зорилго нь “Найрсаг Улаанбаатар” хөтөлбөрийн хүрээнд тавдугаар сарын 20-нд “Улаанбаатар Марафон” олон улсын гүйлтийг амжилттай зохион байгуулах, оролцогч дэмжигчдийн тоог нэмэгдүүлэх, сурталчилгаа мэдээллийг өргөжүүлэх, оролцогчдын тав тухтай орчинг бүрдүүлэх бэлтгэл ажлыг хангах юм. Түүнчлэн “Улаанбаатар Марафон-2017” цом аялах хугацаанд байгууллага, хамт олноос хийж хэрэгжүүлсэн ажил, сургалт, тэмцээн зохион байгуулсан тайлангаа дүүргийн Биеийн тамир спортын хороонд ирүүлэх бөгөөд марафонд идэвхитэй оролцохыг Баянзүрх дүүргийнхэнд уриалж байна.