“Хотуудыг гамшигт тэсвэртэй болгох” санаачилгад Улаанбаатар хот нэгдлээ

НҮБ -ын Гамшгийн эрсдлийг бууруулах газрын “Аюулгүй, гамшгийг даван туулах чадавхтай хотыг бий болгох нь“ уриалгад дэлхийн 3 368 хот нэгдэн орсон байдаг юм. Энэ уриалгад өнөөдөр Улаанбаатар, Дархан, Эрдэнэт хотууд нэгдэн орлоо.

Монгол Улсын Шадар сайд У.Хүрэлсүх хэлэхдээ “Гамшгийн эрсдлийг бууруулах нь ганц улсын, нэг хотын асуудал биш. Дэлхийн хэмжээний том асуудал болсон “ гэдгийг онцоллоо. НҮБ-ын Гамшгийн эрсдлийг бууруулах газар чиглэлээр Монгол Улстай идэвхтэй хамтран ажиллаж байгаад талархаж байгаагаа илэрхийллээ. Мөн АСЕМ-ын дээд хэмжээний уулзалтын дараа орохуйц “Гамшгийн эрсдлийг бууруулах” олон улсын хурлыг Монгол Улсад зохион байгуулах болсныг ч тодотголоо.

Жил бүрийн 10 дугаар сарын 13-ны өдөр НҮБ-аас Гамшгийн эрсдлийг бууруулах олон улсын өдрийг тэмдэглэнэ. Энэ онд “Мэдлэгээ түгээцгээе” уриан дор тэмдэглэж байгааг НҮБ -ын суурин зохицуулагч, НҮБ -ын Хөгжлийн хөтөлбөрийн суурин төлөөлөгч Биата Транкман хэллээ. Монгол Улсын 3 хот тус уриалгад нэгдэж, таван тивийн бусад хотуудтай туршлагаа хуваалцаж, аюулгүй хот болох зорилт тавьж байгааг дэмжиж ажиллана гэдгээ илэрхийллээ. Хотын дарга нарын хувьд “Гамшгийн эрсдлийг бууруулахдаа” төлөвлөлтийн бодлоготойгоо нягт уялдуулж, суурин газрын тогтвортой хөгжилд чухал түлхэц өгдгийг ч хэлсэн юм.

НҮБ-ын Ерөнхий нарийн бичгийн даргын гамшгийн эрсдлийг бууруулах тусгай төлөөлөгч хатагтай Маргарета Волстром Монгол Улсын Шадар сайд У.Хүрэлсүхийн урилгаар Монгол Улсад 2015 оны 05 дугаар сард ажлын айлчлал хийх үеэрээ уг уриалгад Улаанбаатар хотыг нэгдэн орох санаачилгыг анх тавьсан байдаг. Монгол Улсын Шадар сайдын санаачилгаар өнөөдөр Улаанбаатар, Дархан, Эрдэнэт гурван хот уг уриалгад нэгдэн орж, НҮБ-ын Гамшгийн эрсдлийг бууруулах газрын дарга, НҮБ-ын Ерөнхий нарийн бичгийн даргын тусгай төлөөлөгч Роберт Глассерийн гарын үсэгтэй гэрчилгээг гардан авлаа.

Нийслэлийн Засаг дарга бөгөөд Улаанбаатар хотын захирагч С.Батболд хэлэхдээ “Улаанбаатар хот нь НҮБ-тай олон жилийн хамтын ажиллагааны хүрээнд томоохон төсөл хөтөлбөрүүдийг хамтран хэрэгжүүлж, хотын хөгжил дэвшилд ихээхэн түлхэц үзүүлж ирсэн. 2015-2030 онд хэрэгжүүлэх Сендайн үйл ажиллагааны баримт бичгийг хэрэгжүүлэх ажлын хүрээнд дэлхийн хотуудын гамшигтай тэмцэх чадварыг дээшлүүлэх шинэ санаачилгыг хэрэгжүүлэх хотоор Улаанбаатар хотыг сонгосонд талархаж байнa“ гэлээ.

Ирэх дөрвөн жил хэрэгжүүлэх Засаг даргын үйл ажиллагааны мөрийн хөтөлбөртөө гамшгийн эрсдлийг бууруулах асуудлыг чухалчлан анхаарч, менежментийн үйл ажиллагааны хөтөлбөрийг боловсруулах талаар тусгаснаа онцолсон юм.