Хүүхдүүд “Бид чадна” үзэсгэлэн гаргалаа

Монголын Скаутын холбооны дэргэдэх “Бид чадна” бүлгийн аутизмтай хүүхдүүд зургийн үзэсгэлэн гаргалаа.

Үзэсгэлэн Дэлхийн Скаутын хөдөлгөөнийг үүсгэн байгуулагч Роберт Пауэллын төрсөн өдрийг тохиолдуулан 2024 оны хоёрдугаар сарын 22-ны өдөр М Арт Галерейд нээлтээ хийсэн юм.

Хөгжлийн бэрхшээлтэй хүүхдийг эрх тэгш нийгэмшүүлэн хөгжил оролцоог дэмждэг “Бид чадна” бүлгийн скаут хүүхдүүдийн зургийн үзэсгэлэнгийн нээлтэд Хөдөлмөр, нийгмийн хамгааллын Дэд сайд С.Зулпхар оролцож, баяр хүргэлээ.

"Бид чадна" бүлэг аутизмтай холимог скаутын бүлэг бөгөөд 12 аутизмтай скаут, 8 скаут, 8 сайн дурын ажилтан, 1 сэтгэл зүйч, 1 скаутмастер багш гэсэн 30 хүний бүрэлдэхүүнтэй үйл ажиллагаагаа тогтмол явуулж, аутизмтай хүүхдүүдэд энгийн хүүхдүүдийн нэгэн адил хөгжих боломж бүрдүүлж байна гэж ХНХЯ-наас мэдээллээ.