М.Хишигмаа медаль авч чадсангүй

Чөлөөт бөхийн 23 хүртэлх насны ДАШТ-ий эмэгтэйчүүдийн 68 кг-ын жинд “Арслан” клубийн тамирчин, спортын мастер М.Хишигмаа хүрэл медалийн төлөө барилдсан ч ялагдал хүлээлээ.

Тэрбээр Бухарестэд 1/8 шигшээд зохион байгуулагч орны Анна Симона Буйбарыг оноогоор цэвэр (10:0), шөвгийн наймд Унгарын Николетта Смолкаг цэвэр ялсан ч хагас шигшээд энэ жилийн залуучуудын ДАШТ-ий хүрэл медальт Японы Мива Морикавад 0:2 харьцаатай ялагдсан.

Тэгвэл хүрэл медалийн төлөөх барилдаанд АНУ-ын Александрад тун харамсалтай ялагдав. Эл барилдаанд М.Хишигмаа өрсөлдөгчөө 5:2-оор илүүрхсэн ч цаг дуусахаас найман секундын өмнө давхар хамуулан дөрвөн оноо алдаж, халаасанд нь бараг л ороод ирчихсэн медалиа алдлаа.