“Морин хуур-35” наадмын нэгдүгээр шатны шалгаруулалт өндөрлөлөө

Монголын хөгжмийн зохиолчдын холбоо, МҮОНТ, Нийслэлийн соёл урлагийн газар хамтран уламжлал болгон зохион байгуулдаг “Морин хуур-35” наадмын нэгдүгээр шатны шалгаруулалт өчигдөр боллоо.

Улсын филармонийн концертын их танхимд болсон уг шалгаруулалтад мэргэжлийн, нийтийн, рок поп, хүүхдийн гэсэн дөрвөн төрөлд нийт 202 бүтээл өрсөлдсөн юм.

Өчигдрийн шалгаруулалтын ерөнхий шүүгчээр Монгол Улсын урлагийн гавьяат зүтгэлтэн, “Морин хуур” наадмын хошой тэргүүн байрын шагналт, хөгжмийн зохиолч, хөгжим судлаач, Т.Сэр-Од, шүүгчээр Улсын филармонийн ерөнхий удирдаач Шүүгч: Д.Нямдаш, Соёлын төв өргөөний захирал, дуучин Д.Ариунбаатар, төгөлдөр хуурч, хөгжмийн сургалттай “Four goodness” сургуулийн үүсгэн байгуулагч, Т.Пүрэвсүх, Богд хааны ордон музейн захирал, “Болор цом”-ын эзэн, яруу найрагч Ц.Эрдэнэбаатар нар ажилласан юм.

Сонирхуулахад, гала тоглолт буюу эцсийн шалгаруулалт энэ сарын 17-нд Соёлын төв өргөөнд болно.