ОХУ-ын Ерөнхийлөгч Бээжингийн өвлийн олимпод оролцох урилга хүлээн авчээ

ОХУ-ын Ерөнхийлөгч Владимир Путиныг ирэх хоёрдугаар сард болох Бээжингийн өвлийн олимпын нээлтийн ёслолд оролцуулах бэлтгэл ажил хийгдэж байгааг БНХАУ-ын Гадаад хэргийн яам мэдэгдлээ.

Яамны хэвлэлийн төлөөлөгч Жао Лицян мягмар гарагт сэтгүүлчдэд хэлэхдээ, БНХАУ-ын дарга Ши Жиньпин "сайн найз Путин"-ээ ёслолд урьсан бөгөөд Путин "урилгыг баяртайгаар хүлээн авсан" гэжээ.

2014 онд ОХУ-д болсон Сочигийн өвлийн наадмын нээлтийн ёслолд Ши Жиньпин уригдан ирж байжээ.

ОХУ-ын Ерөнхийлөгчийн Хэвлэлийн төлөөлөгч урилга хүлээн авсан тухай өнгөрөгч баасан гарагт мэдэгдсэн байна.

Айлчлалын дэлгэрэнгүй мэдээллийг хоёр тал хэлэлцэж шийдсэний дараа хоёр улсын хэвлэлийн төлөөлөгчид хамтарсан мэдэгдэл хийх юм байна.