Олимп, Дэлхийн аварга Такүто Отогүро Монголын олимпын багийн бэлтгэлд нэгджээ

"Токио-2020" олимпын наадмын алт, "Будапешт-2018" ДАШТ-ий алтан медальт, Ази тивийн хошой аварга Японы бөх Такүто Отогүро, "Афин-2004" зуны олимпын наадмын хүрэл медальт дасгалжуулагч Иноүэ Кэнжи, Кэйсүкэ Отогүро нарын хамтаар өчигдөр манай улсад ирлээ.

Тэрбээр Монголын олимпын багийн бэлтгэлд оролцож байгаа бөгөөд ДАШТ-ий хүрэл медальт, Азийн наадмын аварга, Монгол Улсын гавьяат тамирчин Т.Тулгын гол өрсөлдөгчдийн нэг билээ.

Мөн энэхүү бэлтгэлд Энэтхэг, Япон, ОХУ-ын тамирчид оролцож байна.

Тодруулбал, олимпын мөнгө, ДАШТ-ий хүрэл медальт Рави Кумар, ДАШТ-ий мөнгөн медальт Дээпак Пуниа, Энэтхэгийн чөлөөт бөхийн шинэ од Сүжит Сүжит зэрэг шилдэг бөхчүүд иржээ гэж Монголын Чөлөөт Бөхийн Холбооноос мэдээллээ.