Орон нутаг дахь дээд боловсролын байгууллагын багш нарыг чадавхжуулах сургалт эхэллээ

Боловсрол, соёл, шинжлэх ухаан, спортын яамны санаачилгаар Азийн хөгжлийн банкны Дээд боловсролын шинэчлэл төслийн санхүүжилтээр хөдөө орон нутаг дахь дээд боловсролын байгууллагын багш нарыг чадваржуулах сургалт Улаанбаатар хотноо зохион байгуулагдаж байна.

Энэ удаагийн сургалтад Монгол Улсын Боловсролын Их сургуулийн харьяа Архангай аймгийн Багшийн сургуулийн 36 багш, Дорнод аймгийн Дорнод их сургуулийн 25 багш хамрагдаж байна.

Гурван өдрийн турш үргэлжлэх сургалтын хүрээнд, багшлахуй, суралцахуй, үнэлгээ гэсэн сэдвийн хүрээнд ярилцаж, мэдлэг мэдээлэл солилцох юм.

Багшийн хөгжлийг дэмжих хууль болон Засгийн газрын 145 дугаар тогтоолыг хэрэгжүүлэх үүднээс дээд боловсролын багшийн хөгжлийг дэмжих хүрээнд энэхүү сургалт зохион байгуулагдаж байгаа юм.