Петер Морроугийн нэрэмжит “Гэрэлт морьд” шинэ бүтээлийн төслийн тэтгэлэгт уралдааны эзэд тодров
МУИС-ийн “Социологи нийгмийн ажлын тэнхим”-ийн “Залуу социологич клуб”-ын оюутнуудын санаачилсан “Нийгмийг дүрс зургийн хэлээр илэрхийлэхүй төсөл” тэргүүлж, “Гэрэлт морьд” хөтөлбөрөөс нийт 3500000 төгрөгийн санхүүжилт авахаар болжээ.
Мэдээллийн алба
Монголын урлагийн зөвлөл /МУЗ/ Америк дахь Монголын урлагийн зөвлөлтэй хамтран ХААН банкны гүйцэтгэх захирал болон МУЗ-ийн дэд тэргүүн асан Петер Морроугийн гэгээн дурсгалд зориулсан “Гэрэлт морьд” шинэ уран бүтээлийн төслийн тэтгэлгийн уралдааныг 5 дахь жилдээ зохион байгууллаа.
Тус тэтгэлэгт хөтөлбөр мэргэжлийн уран бүтээлчдийг дэмжих, салбарын өрсөлдөх чадварыг нэмэгдүүлэх зорилготой бөгөөд уг тэтгэлгийн уралдааныг 2022 оны 2 дугаар сард зарлаж, 2022 оны 3 дугаар сарын 25-н хүртэл 19 төслийн санал хүлээн авчээ.
Ийн МУЗ-ийн Удирдах зөвлөлийн төлөөлөл, АНУ дахь МУЗ-ийн Удирдах зөвлөлийн төлөөллөөс бүрдсэн сонгон шалгаруулах хорооны саналаар МУИС-ийн “Социологи нийгмийн ажлын тэнхим”-ийн “Залуу социологич клуб”-ын оюутнуудын санаачилсан “Нийгмийг дүрс зургийн хэлээр илэрхийлэхүй төсөл” тэргүүлж, “Гэрэлт морьд” хөтөлбөрөөс нийт 3500000 төгрөгийн санхүүжилт авахаар болжээ.
