Тоглолтын өмнө: Умард Ирланд-Швейцарь
ДАШТ-ий эрхийн төлөө Умард Ирландын шигшээ баг талбайдаа Швейцарийн багийг хүлээн аван тоглох гэж байна.
Мэдээллийн алба
Энэ өдөр мөн Умард Ирландын шигшээ баг талбайдаа Швейцарийн багийг хүлээн аван тоглох гэж байна. Багуудын эхний тоглолт өнөөдөр болох бол хариу тоглолт Швейцарийн Базель хотноо энэ сарын 12-ны өдөр болно. Майкл О”Нейлл дасгалжуулагчтай Умард Ирландын баг Европын бүсийн сонгон шалгаруулалтын “С” хэсэгт багтаж, 2014 оны дэлхийн аварга Германы шигшээ багийг удаалж, 2-р байрт эрэмбэлэгдсэн.
ОУХБХ-ноос гагадаг дэлхийн чансааны 129-р байрт бичигдэж байсан Умард Ирландын баг өнгөрсөн жилийн ЕАШТ-д оролцож, дэлхийн аваргын сонгон шалгаруулалтад хэсгийн 2-р байрт жагссанаар дэлхийн чансаанд 109 байр урагшилж, 20-р байрт бичигдэж эхлээд байна. 1986 оноос Мексикийн дэлхийн аваргаас хойш ДАШТ-д оролцож чадаагүй байгаа Умард Ирландчууд дэлхийн хаан спорт хөлбөмбөгийн ноён оргил болсон томоохон тэмцээнд оролцох эрхээ авахад одоо ганцхан даваа үлдээд байна.
Плэй-оффт өрсөлдөхөөр болсон 8 багийн сугалаа ёсоор Умард Ирландын багтай Швейцарьчууд өрсөлдөнө. Швейцарийн баг тэмцээний “С” хэсэгт багтаж, Португалийн шигшээ багтай адил 10 тоглолтод 9 хожсон амжилтыг үзүүлсэн ч гоолын зөрүүгээрээ 2016 оны Европын аварга Португалчууд хэсгээ тэргүүлж, Швейцарийн баг тун харамсалтай байдлаар 2-р байрт шалгарсан. Швейцарийн баг одоогоор дэлхийн чансааны 11-р байрт эрэмбэлэгдэж байгаа нь энэ улсын шигшээ багийн түүхэн дэх хамгийн өндөр үзүүлэлт юм. Тэдний хувьд өнгөрсөн 2014 оны дэлхийн аваргад эрхээ аван оролцон хэсгээсээ гарч, улмаар шөвгийн 16-н шатанд Аргентиний багт нэмэлт цагт хожигдож байсан билээ.
