Улсын цолтой ахмад бөхчүүдэд “Цолны хишиг” олгоно

Монголын үндэсний бөхийн холбооны 2024-2025 онд хийх ажлын төлөвлөгөөнд тусгагдсаны дагуу сүүлийн жилүүдэд тасраад байсан улсын цолтой ахмад бөхчүүдэд олгодог “Цолны хишиг”-ийг энэ жилээс сэргээн олгоно.

Холбооны удирдлагын бүртгэлийн маргаан, ковид цар тахал, Монгол бөхийн өргөөний их засвар тохижилт, өргөтгөлийн барилгын ажлаас шалтгаалан тасраад байсан “Цолны хишиг”-ийн журамд зохих өөрчлөлтүүдийг оруулсан бөгөөд энэ жилээс эхлэн жил бүр тогтмол олгохоор төлөвлөсөн.

Иймд 60-аас дээш настай улсын цолтой ахмад бөхчүүд 02 дугаар сарын 27-ны өдөр 14:00 цагт Монгол бөхийн өргөөнөөс “Цолны хишиг”-ээ авах аж.