“Universe best songs” наадмын шилдгүүд өрсөлдөнө

“Мөрөөдлийнхөө төлөө ухаалаг амьдарцгаая” уриан дор зургаа дахь жилдээ зохион байгуулагдсан “Universe best songs-2014” наадам шилдгүүдээ тодруулжээ. Тус наадмын үе, үеийн шилдэг оролцогчид анх удаа нэгдэж, тухайн наадмын тайзнаа дахин дуулж, нөхөрсгөөр өрсөлдөхөөр болжээ.

Өрсөлдөөн нэгдүгээр шатанд гадаад дуу, хоёрдугаар шатанд монгол дуу, гуравдугаар шатанд дуэт дуу, дөрөвдүгээр шатанд гала концерт гэсэн үе шаттайгаар явагдах аж.

Уг шалгаруулалтын үеэр хасалт хийгдэхгүй ч гуравдугаар шатнаас шилдгийн шилдэг 15 оролцогчийг тодруулж, гала концертод оролцох эрх олгох гэнэ.

Нэгдүгээр байр эзэлсэн хүн “Гран-При” шагналтан болох аж. Их Британи Умард Ирландын Нэгдсэн вант улсад үнэ төлбөргүй нэг жил суралцах эрхтэй болно. Наадмаас шалгарсан тэргүүн байрын эзний сургалтын төлбөр, оюутны визийн хураамж, ном сурах бичиг, аяллын болон эрүүл мэндийн даатгал, байр, өглөө, оройн хоол, ирэх, очих нислэгийн зардлыг даах юм байна.