Ёндонпэрэнлэйн Басхүү Азийн аварга болж, Төрийн дууллаа эгшиглүүллээ

Жүдо бөхийн 2022 оны Ази тивийн аварга шалгаруулах тэмцээн энэ сарын 4-7-нд Казахстаны нийслэл Нурсултан хотод болж байна. Тус тэмцээний эхний өдөр Үндэсний шигшээ баг, “Хилчин” спорт хорооны тамирчин ОУХМ Ёндонпэрэнлэйн Басхүү эрэгтэйчүүдийн 66 кг-ын жинд зодоглолоо.

Тэрбээр эхэнд гоц мөргөж, 1/4 шигшээд АНЭУ-ын Гурам Завашвилиг вазаригаар, хагас шигшээд Узбекистаны Мухриддин Тилововыг, финалд Японы Рёома Танакаг "иппон" үнэлгээгээр ялснаар Азийн аварга болж Монгол Улсын Төрийн дууллаа эгшиглүүллээ.

Харин эрэгтэйчүүдийн 66 кг-д зодоглосон ОУХМ Б.Эрхэмбаяр хүрэл медалийн төлөөх барилдаанд С.Тилововт нэмэлт цагт вазаригаар ялагдсан байна.