Шууд Chart

УИХ-ын гишүүд Ази, Номхон далайн орнуудын парламентчдын форумын уулзалтад оролцож байна

2018-08-23 15:59:44

Дэлхийн эрүүл мэндийн байгууллага болон Филиппин Улсын парламентаас хамтран зохион байгуулж буй Дэлхийн эрүүл мэндийн асуудлаарх Ази, Номхон далайн орнуудын парламентчдын форумын 4 дүгээр уулзалт Филиппин Улсын нийслэл Манила хотноо өнөөдөр (2018.08.23) эхэллээ. Уулзалтаар Ази, Номхон далайн бүсийн 21 орноос 50 гаруй парламентын гишүүд хуран чуулж байгаагийн дотор УИХ-ын гишүүн, Олон Улсын Парламентын Холбооны Хүний эрх, ардчиллын байнгын хорооны Удирдах зөвлөлийн гишүүн Б.Саранчимэг, УИХ-ын гишүүн Б.Ундармаа нар Монголын Улсыг төлөөлөн оролцож байна.

Энэхүү форум нь эрүүл мэндийн асуудлаар тогтвортой үйл ажиллагаа явуулахад парламентчид санал бодлоо солилцох, улс төрийн дэмжлэг үзүүлэх, чадавх, нөөц бололцоогоо сайжруулах, хамтын ажиллагаагаа хөгжүүлэхэд чухал талбар болдгоороо онцлог юм.

Дөрөвдүгээр уулзалтаар санхүүжилт болон зохицуулалт хийх замаар эрүүл мэндийн тусламж үйлчилгээг бүх нийтэд хүртээх чиглэлээр үр дүнтэй бодлого боловсруулах, хэрэгжүүлэх, үнэлэлт дүгнэлт өгөхөд парламентчдын гүйцэтгэх үүргийг онцгойлон хэлэлцэж байна. Бүх нийтийн эрүүл мэндийн хамралт нь санхүүгийн хүндрэл бэрхшээлгүйгээр эрүүл мэндийн чанартай тусламж үйлчилгээг хүртэх боломжийг хүн бүрт олгох тухай асуудал бөгөөд энэ нь Тогтвортой хөгжлийн зорилтуудын эрүүл мэндийн зорилтод хүрэхэд нэн чухал суурь нь болж өгдөгийг Ази, Номхон далайн орнуудын парламентчид онцлон тэмдэглэлээ.

УИХ-ын гишүүн Б.Саранчимэг “Бүх нийтийн эрүүл мэндийн хамралтаар дамжуулан Тогтвортой хөгжлийн зорилтуудын Эрүүл мэндийн зорилтод хүрэх нь” сэдвээр үг хэлж, энэ чиглэлээр Монгол Улсын гаргасан санал санаачилгууд, үр дүн, ахиц дэвшлийн талаарх туршлагаас хуваалцлаа.


УИХ-ын гишүүд Ази, Номхон далайн орнуудын парламентчдын форумын уулзалтад оролцож байна  
Үзсэн: 188 Mongolian National Broadcaster  

Сэтгэгдэл бичих:

АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.
1000 Сэтгэгдэлээ бичнэ үү

Бидэнтэй нэгдээрэй