Шууд Chart

Бусдыг дууриаж эвшээхийн учир...

2019-03-15 12:45:55

Хэрэв хэн нэгэн эвшээж байгааг харчихвал өөрийн эрхгүй дагаж эвшээх гээд байдгийг бид мэднэ. Тийм ч учраас эвшээхийг халдварладаг гэлцдэг. Тэгвэл хүмүүс яагаад эвшээсэн нэгнээ дууриадаг юм бол. Үнэндээ энэ асуултад яг таг өгөх хариулт байхгүй. Гэхдээ судалгаан дээр үндэслэсэн нэг онол бий. Эвшээхийг нойр хүрч унтахад бэлэн болсны дохио гэж бид ойлгодог. Гэтэл дээрх онолоор бол эвшээх нь унтахад бэлэн гэсэн дохио бус харин ч тархи өөрийгөө сэргээх гэж оролдож буйн шинж гэнэ. 
 
Хүн эвшээснээр тархи сэрүүцэж, илүү үр бүтээлтэй ажиллах дохио хүлээн авдаг аж. Өөрөөр хэлбэл, тархи өөрөө өөрийгөө сэрэхийг ингэж сануулдаг байна. Тэгвэл энэ үйлдэл бусдад халдварладгийн учир нь таны тархи ч бас сонор сэрэмжээ алдахгүй байх хэрэгтэй гэдгийг өөртөө сануулж байгаа хэрэг юм.
 
Ер нь эвшээхэд дууриадаг бол орчин тойрноо сайн мэдэрдэг, хүмүүстэй харилцан ойлголцож чаддагийн илрэл гэдгийг сүүлийн үед хийсэн судалгаагаар батлагдсан байна. Эвшээх үйлдэлд амархан халдварладаг хүмүүс бусдын сэтгэл хөдлөл, мэдрэмжийг ойлгож хүлээн авахдаа сайн байдаг ажээ. Гэхдээ хүн дууриаж эвшээх чадвар нийт хүн амын тал хувьд л байдаг гэнэ. Хэрвээ та үүнд хамааралтай гэж үзвэл өөрийгөө мэдрэмжтэйд тооцож болно шүү.
 
Мөн “Эвшээлт халдвар түгээгч гэдгийг баталгаажуулахын тулд заавал дэргэдээ байгаа нэгний эвшээхийг хүлээж суух шаардлагагүй. Ердөө л энэ тухай бодоход хангалттай. Шинжлэх ухааны академи энэ сонирхолтой үзэгдлийг одоо хүртэл судлахгүй байгаа нь хачирхалтай” гэж Британийн сэтгэл зүйч Катрина Моррисон ярьжээ.
 
Эвшээх үзэгдэл нь хүмүүжил муутай юм уу бүдүүлэг байдлын илэрхийлэл бус харин ч эсрэгээрээ цайлган сэтгэл, тайван байдлын шинж тэмдэг гэдэгт Их Британийн сэтгэл зүйчид итгэлтэй байдаг аж. Судлаачид өмнө нь амиа хичээсэн үзэлтэй хүмүүс бага эвшээдэг гэсэн дүгнэлтийг хийж байсан. Ямартаа ч эвшээх үзэгдэл тархины үйл ажиллагааг идэвхжүүлж, бие махбодийг сэргээж, тэнцвэржүүлэхэд тусалдаг жирийн хөдөлгөөн гэж эртнээс тооцогдсоор иржээ.
 

Бусдыг дууриаж эвшээхийн учир...  
Үзсэн: 977 Mongolian National Broadcaster  

Сэтгэгдэл бичих:

АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.
1000 Сэтгэгдэлээ бичнэ үү
Зочин [127.0.0.xxx] 2019-03-16 16:37
тархи өөрийгөө сэргээх гэж оролдож буйн шинж

Бидэнтэй нэгдээрэй