Шууд Chart

Зуслангийн бүсэд “Нийгмийн даатгалын явуулын үйлчилгээ”-г хүргэлээ

2019-07-16 10:23:32

Нийгмийн даатгалын үйлчилгээ, хуулийн зөвлөгөө, мэдээлэл авах хүсэлтэй ч цаг завгүйн улмаас хойшлуулсаар, тусламж үйлчилгээ авах боломжоо хязгаарласаар байгаа иргэддээ нийгмийн даатгалын үйлчилгээг явуулын байдлаар хүргэж эхэлснээс хойш 3 сарын хугацаа өнгөрч байна. Иргэдийн амралт зугаалгын үе эхэлсэнтэй холбоотойгоор энэ удаад бид зуслангийн бүсэд зохион байгууллаа.

Өнгөрсөн амралтын өдөр /2019.07.06/ Шаргаморьт, Жигжид орчимд нийгмийн даатгалын 13 ажилтан очиж, 85 даатгуулагч, иргэнд зөвлөгөө өгч үйлчилгээ үзүүллээ. Энэ үеэр зарим иргэдийн сэтгэгдлийг сонссон юм.

ЧИНГЭЛТЭЙ ДҮҮРГИЙН 9-Р ХОРООНЫ ИРГЭН С.САРАНГЭРЭЛ: Би ирэх жил тэтгэвэртээ сууна. “Дүүргийн нийгмийн даатгал дээр очиж зөвлөгөө авна даа” гэж хойшлуулсаар өдий хүрсэн. Манай лагер энүүхэнд ойрхон байдаг юм. Нийгмийн даатгалын хүүхдүүд ирсэн явуулын үйлчилгээ үзүүлж байна гэхээр нь ирж зөвлөгөө авлаа. Бас тэтгэврээ урьдчилан тооцуулж авлаа. Ард иргэд бидэнд хүрсэн сайхан үйлчилгээ болжээ.

ЧИНГЭЛТЭЙ ДҮҮРГИЙН 17-Р ХОРООНЫ ИРГЭН Ч.БАТ-ОРШИХ: Хүн болгон амарч зугаалж байгаа энэ үед, тэгээд амралтын өдөр албаны хувцастайгаа энэ алслагдсан газар ирээд үйлчилгээ үзүүлж байгаа нь сайхан санагдлаа. Би саяхан ажлаасаа гарсан, хувиараа нийгмийн даатгалаа төлөхөд ямар ашиг тустай байдаг, хэдэн төгрөг тушаадаг зэргийг тодруулахаар энд ирсэн.

Малчны хот, худалдаачны лангуу, ажилтны ажлын байранд хүрч үйлчлэх зорилго бүхий тус өдөрлөгийг өнгөрсөн хугацаанд нийтдээ 22 удаа зохион байгуулж, 4083 иргэнд хуулийн зөвлөгөө, мэдээлэл өгсөн байна. Түүнчлэн сайн дурын даатгалд 201, эрүүл мэндийн даатгалд 342 даатгуулагчийг хамруулж, “Нийгмийн даатгал” аппликейшнний кодыг 475 иргэнд олгожээ.

Эх сурвалж: НДЕГ

 


Зуслангийн бүсэд “Нийгмийн даатгалын явуулын үйлчилгээ”-г хүргэлээ  
Үзсэн: 115 Mongolian National Broadcaster  

Сэтгэгдэл бичих:

АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.
1000 Сэтгэгдэлээ бичнэ үү

Бидэнтэй нэгдээрэй